काठमाडौं । आज (कात्तिक १६ गते) देखि देशभरका सरकारी कार्यालयमा हिउँदे समयतालिका लागू भएको छ। सरकारको निर्णयअनुसार अब सरकारी कार्यालय बिहान ९ बजेदेखि अपराह्न ४ बजेसम्म मात्रै सञ्चालन हुनेछन्।
.gif)
नेपाल राजपत्रमा प्रकाशित सूचना अनुसार नयाँ समयतालिका आगामी माघ १५ गतेसम्म लागू हुनेछ। यसअघि सरकारी कार्यालय बिहान ९ बजेदेखि साँझ ५ बजेसम्म सञ्चालन हुँदै आएका थिए।
जाडोयाममा दिन छोटो हुने र साँझ चाँडै पर्ने भएकाले सेवाग्राही तथा कर्मचारीको सहजतालाई ध्यानमा राख्दै कार्यालय समय एक घण्टा घटाइएको हो।
हाल सरकारी कार्यालय सातामा पाँच दिन (आइतबारदेखि शुक्रबार) सञ्चालन हुँदै आएका छन्। यसअघि पेट्रोलियम पदार्थको आपूर्तिमा देखिएको असहजता र इन्धन खपत घटाउने उद्देश्यले सरकारले शनिबार र आइतबार सार्वजनिक बिदा दिने निर्णय गरेको थियो।
नयाँ समयतालिका लागू भएसँगै सेवाग्राहीले अपराह्न ४ बजेसम्म मात्रै सरकारी सेवा लिन सक्नेछन्। माघ १६ गतेदेखि भने सरकारी कार्यालय पुनः नियमित समयतालिका अनुसार बिहान ९ देखि साँझ ५ बजेसम्म सञ्चालन हुनेछन्।
