काठमाडौँ । आजकल धेरै व्यक्तिहरू च्याटजीपीटी जस्ता एआई च्याटबटहरूलाई चिकित्सक, वकिल वा परामर्शदातालाई जस्तै व्यवहार गरिरहेका छन् । यसले उनीहरूको व्यक्तिगत गोपनीयताका लागि गम्भीर समस्या निम्त्याएको छ । किनकि यी कुराकानीहरूमा गोपनीयताका नियमहरू लागु हुँदैनन् र यसरी उपलब्ध गराइएका जानकारीको के हुन्छ भन्ने स्पष्ट छैन ।
.gif)
एक अन्तर्वार्ताका क्रममा च्याटजीपीटी निर्माता कम्पनी ओपनएआईका सीईओ साम अल्टम्यान स्वयँले पनि एआई च्याटबटमा गोप्य जानकारी शेयर गर्दा सावधानी अपनाउन सुझाव दिएका छन् । उनले एआईसँगको कुराकानीमा चिकित्सक वा वकिलसँगको कुराकानीमा जस्तै गोपनीयताको सुरक्षा हुनुपर्नेमा जोड दिएका छन् । मानिसहरूले एआईलाई थेरापिस्ट, लाइफ कोच जस्तै प्रयोग गरिरहेका हुन्छन् । विशेष गरी युवाहरूले व्यक्तिगत सम्बन्धका समस्या जस्ता संवेदनशील विषयहरूमा पनि सल्लाह मागिरहेका हुन्छन् । तर, यहाँनिर ख्याल गर्नुपर्ने कुरा के छ भने थेरापिस्ट वा वकिलसँगको कुराकानीमा कानुनी विशेषाधिकार हुन्छ, तर एआईसँगको कुराकानीमा त्यस्तो कानुनी सुरक्षा छैन ।
अल्टम्यानका अनुसार यदि तपाईँले च्याटजीपीटीलाई अति संवेदनशील जानकारी बताउनुभयो र पछि कुनै मुद्दा वा कानुनी विवाद आयो भने ओपनएआईलाई ती कुराकानीहरू पेस गर्न बाध्य पारिन सक्छ । उनी यसलाई 'अत्यन्तै गलत' मान्छन् र एआईसँगको कुराकानीमा पनि चिकित्सकसँगको जस्तै गोपनीयताको अवधारणा हुनुपर्ने विश्वास राख्छन् । उदाहरणका लागि, ओपनएआईले न्युयोर्क टाइम्ससँगको प्रतिलिपि अधिकार उल्लङ्घन मुद्दामा प्रयोगकर्ताका कुराकानीहरू राख्नका लागि गरिएको अनुरोधमा आपत्ति जनाएको थियो ।वास्तवमा एआई टुलहरूमा गोप्य कुराहरू बताउँदा गोपनीयता नै सबैभन्दा महत्त्वपूर्ण सरोकार हो । एआई मोडलहरूले कसरी काम गर्छन् र तपाईँका कुराकानीहरू अन्य व्यक्तिका च्याटहरूमा देखा पर्छन् कि पर्दैनन् भन्ने बारेको अनिश्चितता नै हिचकिचाहटको लागि पर्याप्त कारण हो ।
यदि च्याटजीपीटी वा अन्य कुनै उपकरणले तपाईँको थेरापी सेसन वा चिकित्सा प्रश्नहरूबाट जानकारी दोहोर्याउँछ भने तपाईँको बीमा कम्पनी वा तपाईँको व्यक्तिगत जीवनमा रुचि राख्ने अरू कसैले सोही उपकरणलाई तपाईँको बारेमा सोध्दा त्यो जानकारी देखा पर्न सक्छ ।त्यसैले हरेक प्रयोगकर्ताले गोपनीयताको बारेमा गम्भीर बन्नुपर्छ र आफूले यी च्याटबटहरूलाई बताएका लगभग सबै कुरा गोप्य हुँदैनन् भन्ने कुरा बुझ्नु पर्छ । यसको अर्थ तपाईँले च्याटबटलाई बताउने कुनै पनि जानकारी तपाईँको सहमति वा जानकारी बिना नै विभिन्न तरिकाले प्रयोग हुन सक्छ ।
