हेटौंडा । तीन तहका सरकारले उद्यमीको स्तर हेरेर कुन मोडेलमा उनीहरुलाई उद्यमशील बनाउने हो भनेर योजना बनाउनुपर्ने हो । तर, त्यसो हुन सकिरहेको देखिन्न । कामको खोजीमा भौँतारिएका युवालाई उद्यमशील बनाउने कार्यक्रममा समेट्न सकियो भने मुलुकको समृद्धिको यात्रामा सहयोग पुग्न सक्छ ।
.gif)
यही तथ्यलाई मनन् गरेर हेटौंडा–२ मा अवस्थित देशकै प्रतिष्ठित मकवानपुर बहुमुखी क्याम्पसले नयाँ अवधारणा अगाडि सारेको छ । क्याम्पसले बिजनेस इन्कुवेसन सेन्टर स्थापना गरेको कार्यक्रममा बागमती प्रदेशका मुख्यमन्त्री बहादुरसिंह लामाले हालको पाठ्यक्रमले प्रभावकारीरुपमा व्यावसायिक जनशक्ति उत्पादन गर्न नसकिने दाबी गरे । उनले समयानुकूलरुपमा शैक्षिक पाठ्यक्रम परिमार्जन गर्नुपर्ने आवश्यकता औँल्याए ।
क्याम्पसमा स्थापना भएको बिजनेस इन्कुवेसन सेन्टर उद्घाटन गर्दै मुख्यमन्त्री लामाले बजारको मागअनुसार व्यावसायिक तथा दक्ष जनशक्ति उत्पादनमा शिक्षालाई जोड्नु आवश्यक रहेको बताए । उनले वर्तमान समयमा परम्परागत् शैलीमा दिइएको ज्ञानले अर्थ नराख्ने भन्दै शिक्षालाई समयअनुसार परिवर्तन गरी व्यावसायिक र रोजगारमुखी बनाउनुपर्ने धारणा राखे । सेन्टरले व्यावसायिक जनशक्ति उत्पादन गर्ने र विद्यार्थी लाभान्वित हुनेमा मुख्यमन्त्री लामाले विश्वास व्यक्त गरे ।
बागमती प्रदेशका प्रथम मुख्यमन्त्री डोरमणि पौडेलले नेपालमा केही गर्न सकिन्न, केही छैन भन्ने सोच बदल्नु जरुरी रहेको बताए । विद्यार्थी पलायन हालकै गतिमा हुने हो भने निकट भविष्यमा नेपाल वृद्धाश्रमको देश बन्ने उनले ठोकुवा गरे । इन्क्युवेसन सेन्टरमार्फत् व्यावसायिक जनशक्ति उत्पादन गरी देशमै बसेर केही गर्न सक्छौं भन्ने सोच विकास गर्ने गरी काम गर्न उनले आग्रह गरे ।
क्याम्पस सञ्चालक समिति अध्यक्ष अनन्त पौडेलले विगतका अन्य इन्कुबेसनमा सहभागी व्यक्ति (इन्कुबेटिज) हरु यतिखेर उद्यमीमा रुपान्तरण भएकामात्र छैनन्, उद्यमशीलतामार्फत् स्वदेश तथा विदेशमासमेत उल्लेख्य उपलब्धि हासिल गरिरहेको बताए । ‘इन्कुबेसनलाई एउटा अभियानकै रुपमा लैजाने क्याम्पसको योजना छ,’ उनले थपे –बिजनेस इन्कुवेसन सेन्टरले हाम्रा कलेजका विद्यार्थीको व्यावसायिक रुचि र क्षमता अभिवृद्धि गर्दै उद्यमशीलतातर्फ प्रेरित गर्नेछ ।
उनले सिप तथा नौलो व्यावसायिक योजना भएका तर आर्थिक र उचित वातावरण अभाव भएका विद्यार्थीलाई पछिल्लो समय शैक्षिक प्रतिष्ठान तथा निजी क्षेत्रका इन्कुबेसन सेन्टरले सेवा दिँदै आएको दृष्टान्त दिए । ‘नवीनतम् सोच र व्यावसायिक योजना भएका युवासँग स्टार्टअपका लागि धेरै कुरामा अलमल हुन्छ । त्यही भएर बिजनेस इन्कुबेसन सेन्टरमार्फत् उनीहरुलाई उद्यमशील बनाउनका लागि मद्धत गरिनेछ । उनले अर्निङ एण्ड लर्निङ (कमाउँंदै पढ्दै) को अवधारणालाई साकार बनाउन सेन्टरले रोजगारदाताहरुसँग सम्पर्क र समन्वय गर्ने बताए । ‘कार्यक्रमलाई प्रभावकारी बनाउन नमूना सम्वद्र्धन केन्द्र सञ्चालन गरिनेछ भने प्रादेशिक सरकार र उपमहानगरले व्यवसाय सम्वद्र्धन केन्द्र सञ्चालन गर्ने वातावरणका लागि आवश्यक समन्वयसमेत गर्दैछौं,’ उनले भने ।
उद्योग संघ, उद्योग वाणिज्य संघ, प्रदेश सरकार र संघीय सरकारका औद्योगिक प्रवर्धन केन्द्रसँग जोडिएर विद्यार्थीको व्यावसायिक क्षमता बढाउन तालीम तथा प्रशिक्षण आयोजना गरिने उनको कथन छ । अध्यक्ष पौडेलका अनुसार बिजनेस इन्कुबेसन सेन्टरका सेवाहरुमा कार्यकक्ष (वर्क स्टेसन) र कम्प्युटरलगायत कार्यालयसम्बन्धि उपकरण एवम् इन्टरनेट र सञ्चार सुबिधा, व्यावसायिक योजना निर्माण तालीम तथा व्यावसायिक सोचको विकास, पुँजी व्यवस्थापनसम्बन्धि परामर्श, बजार व्यवस्थापन तथा लेखासम्बन्धि प्रशिक्षण र परामर्श सेवा, प्राविधिक प्रशिक्षण, परामर्श, प्रयोगशाला प्रयोग र परीक्षणसम्बन्धि सुबिधाका लागि सहयोग, व्यवसाय स्थापनासम्बन्धि कानुनी तथा प्रशासनिक सहायता, बौद्धिक सम्पत्ति संरक्षणसम्बन्धी परामर्श र सहयोग, औद्योगिक भ्रमणबाट उद्यमशीलता तथा प्रविधिबारे ज्ञान, सम्वद्र्धन अवधि पूरा भएपछि पनि सम्पर्क, अनुगमन, परामर्श र सहयोगको नियमित व्यवस्था र व्यावसायिक पहिचान विस्तार गर्न सहयोगलगायत छन् ।
कार्यक्रममा क्याम्पस प्रमुख डा. यमबहादुर सिलवालले विद्यार्थीमा पढाइ र क्षमता अभिवृद्धिसँगै सिप र रोजगारी सिर्जना गर्न इन्क्युवेसन सेन्टरले सहयोग पु¥याउने बताए ।
