काठमाडौं । ग्लोबल आइएमई बैंक लिमिटेडले काठमाडौंको उत्तरढोकामा अत्याधुनिक कर्पोरेट भवन निर्माण सुरु गरेको छ ।
.gif)
शुक्रबार आयोजित एक समारोहबीच बैंक सञ्चालक समितिका अध्यक्ष चन्द्रप्रसाद ढकाल र प्रमुख कार्यकारी अधिकृत सुरेन्द्रराज रेग्मीले विधिपूर्वक भूमिपूजा गर्दै भवन निर्माणको औपचारिक सुरुआत गरेका हुन् ।
करिब १ लाख ४६ हजार वर्गफिट क्षेत्रफलमा फैलिने प्रस्तावित भवन १२ तलाको हुनेछ । भवनमा सवारीसाधन पार्किङका लागि दुईवटा भूमिगत बेसमेन्ट, एउटा ग्राउन्ड फ्लोर र माथि नौवटा तला रहने बैंकले जनाएको छ ।
आधुनिक वास्तुकला, वातावरणमैत्री पूर्वाधार र अत्याधुनिक प्रविधि समेटेर निर्माण गर्न लागिएको भवनलाई काठमाडौं उपत्यकाकै नमुना व्यावसायिक भवनका रूपमा विकास गर्ने बैंकको लक्ष्य छ ।
भूमिपूजापछि बोल्दै अध्यक्ष ढकालले नयाँ भवन वाणिज्य बैंकका कर्पोरेट कार्यालयमध्ये सबैभन्दा आधुनिक र ठूलो संरचनामध्ये एक हुने बताए । उनले भवन अत्याधुनिक तथा सुविधासम्पन्न हुनुका साथै काठमाडौं उपत्यकाको एउटा पहिचानयोग्य संरचना बन्ने विश्वास व्यक्त गरे ।
नयाँ भवन निर्माणसँगै सेवाग्राहीले बैंकिङ सेवा अझ सहज, प्रविधिमैत्री र प्रभावकारी रूपमा प्राप्त गर्न सक्ने उनको भनाइ छ ।
त्यस्तै, प्रमुख कार्यकारी अधिकृत रेग्मीले सेवाग्राही तथा कर्मचारीको सुविधालाई ध्यानमा राखेर भवनको डिजाइन र निर्माणमा आधुनिक इन्जिनियरिङलाई प्राथमिकता दिइएको बताए ।
उनका अनुसार भवनलाई ऊर्जा बचत गर्ने शैलीमा निर्माण गरिनेछ । पानीको व्यवस्थापनका लागि वर्षाको पानी संकलन तथा प्रशोधन प्रणाली जडान गरिनेछ भने विद्युत् खपत घटाउन सौर्य ऊर्जा प्रणालीसमेत प्रयोग गरिनेछ ।
यसबाट प्राकृतिक स्रोतको उचित उपयोग हुनुका साथै वातावरणीय सन्तुलन कायम राख्न सहयोग पुग्ने बैंकको विश्वास छ ।
कार्यक्रममा बैंकका नायब प्रमुख कार्यकारी अधिकृत सुमन पोखरेलसहित उच्च व्यवस्थापन समूहका सदस्य तथा कर्मचारीहरूको उपस्थिति रहेको थियो ।
