कामना सेवा विकास बैंक लिमिटेडले आर्थिक वर्ष २०८२/८३ को चौथो त्रैमास (असार मसान्त) सम्मको अपरिष्कृत वित्तीय विवरण सार्वजनिक गरेको छ। बैंकले व्यवसाय विस्तार र इम्पेरमेन्ट चार्ज (Impairment Charges) मा आएको उल्लेखनीय गिरावटको बलमा आफ्नो खुद नाफामा आकर्षण वृद्धि दर्ता गरेको छ।

नाफा र वितरणयोग्य मुनाफाको अवस्था

समीक्षा अवधिमा बैंकले ८९ करोड ४१ लाख ७८ हजार रुपैयाँ खुद नाफा आर्जन गरेको छ। यो अघिल्लो आर्थिक वर्षको सोही अवधिको तुलनामा ३३.५१ प्रतिशतले बढी हो। अघिल्लो वर्ष बैंकले ६६ करोड ९७ लाख ५१ हजार रुपैयाँ खुद नाफा कमाएको थियो। शेयरधनीहरूका लागि महत्त्वपूर्ण मानिने बैंकको वितरणयोग्य मुनाफा (Distributable Profit) ६० करोड ११ लाख १० हजार रुपैयाँ रहेको छ, जुन अघिल्लो वर्षको तुलनामा २.३० प्रतिशतले बढी हो। यस आधारमा बैंकको वितरणयोग्य प्रतिशेयर आम्दानी (Distributable EPS) १५ रुपैयाँ १६ पैसा काय भएको छ।

मुख्य वित्तीय सूचकहरू:

• चुक्ता पूँजी र जगेडा कोष: बैंकको चुक्ता पूँजी १९.९७ प्रतिशतले बढेर ४ अर्ब २१ करोड १९ लाख ३० हजार रुपैयाँ पुगेको छ। त्यस्तै, बैंकको कुल जगेडा तथा कोष (Reserve and Surplus) १३.०१ प्रतिशतले वृद्धि भई २ अर्ब ७४ करोड २४ लाख २० हजार रुपैयाँ पुगेको छ।

• निक्षेप तथा कर्जा प्रवाह: बैंकले ग्राहकहरूबाट ६६ अर्ब १७ करोड ७५ लाख रुपैयाँ निक्षेप संकलन गरी ५४ अर्ब २१ करोड १ लाख ७० हजार रुपैयाँ कर्जा तथा सापटी प्रवाह गरेको छ। निक्षेप संकलनमा ५.३२ प्रतिशत र कर्जा प्रवाहमा ८.२५ प्रतिशतको वृद्धि देखिएको छ।

• इम्पेरमेन्ट चार्जमा गिरावट: बैंकको नाफा बढ्नुको मुख्य कारण इम्पेरमेन्ट चार्जमा आएको ६७.३४ प्रतिशतको ठूलो गिरावट हो। अघिल्लो वर्ष ४१ करोड ८१ लाख रुपैयाँ रहेको यस्तो चार्ज घटेर १३ करोड ६५ लाख ४८ हजार रुपैयाँमा झरेको छ।

• आम्दानी र सञ्चालन नाफा: बैंकको खुद ब्याज आम्दानी ३.९८ प्रतिशतले बढेर २ अर्ब ४१ करोड ८ लाख रुपैयाँ पुगेको छ भने कुल सञ्चालन आम्दानी २ अर्ब ८३ करोड ९५ लाख रुपैयाँ पुगेको छ। सञ्चालन नाफा पनि ३२.८७ प्रतिशतले बढेर १ अर्ब ३८ करोड २५ लाख रुपैयाँ पुगेको छ।

प्रतिशेयर आम्दानी र सूचकहरू

नाफामा आएको सुधारसँगै बैंकको प्रतिशेयर आम्दानी (EPS) २२ रुपैयाँ ७५ पैसा पुगेको छ, जुन अघिल्लो वर्ष १९ रुपैयाँ ०८ पैसा थियो। बैंकको प्रतिशेयर नेटवर्थ १७१ रुपैयाँ ०१ पैसा र मूल्य आम्दानी अनुपात (P/E Ratio) २०.८४ गुणा रहेको छ।

निष्क्रिय कर्जा 

बैंकको समग्र वित्तीय अवस्था मजबुत देखिए पनि खराब कर्जा (Non-Performing Loan) भने केही बढेको छ। अघिल्लो वर्ष ३.४९ प्रतिशत रहेको निष्क्रिय कर्जा समीक्षा वर्षको अन्त्यसम्म आइपुग्दा ३.७७ प्रतिशत पुगेको छ। मुलुकको अर्थतन्त्रमा आएको शिथिलताका कारण कर्जा असुलीमा केही समस्या परेको बैंकको व्यवस्थापकीय विश्लेषणमा उल्लेख छ।

अन्य बैंकिङ सूचकहरू:

• क्रेडिट टु डिपोजिट (CD) Ratio: ८६.३४%

• आधार दर (Base Rate): ५.५३% (अघिल्लो वर्ष ७.०७% थियो)

• ब्याजदर स्प्रेड (Interest Rate Spread): ३.९८%

• पूँजी कोष पर्याप्तता (Capital Fund to RWE): १४.१६%