महोत्तरी, २० माघ । आगामी फागुन २१ गते हुने प्रतिनिधिसभा सदस्य निर्वाचनको तयारी भइरहँदा महोत्तरी क्षेत्र नं ३ का मतदाताले सुशासनलाई मुख्य मुद्दा बनाएका छन् । जिल्ला सदरमुकामस्थित जलेश्वर नगरपालिकाका मतदाताले सुशासन सहित सामाजिक न्यायको सहज पहुँच हुनुपर्ने धारणा राखेका हुन् ।
.gif)
जलेश्वर नगरपालिकाका १२ वटा वडा, मटिहानी नगरपालिकाका नौ, मनराशिशवा नगरपालिकाका ८, ९ र १०, पिपरा गाउँपालिकाका १, २, ३, ४, ५ र ७ तथा एकडारा गाउँपालिकाका १, २, ३, ४ र ५ वडाका मतदाताले चुनावी अभियानमा खटिएका दलका उम्मेदवारसँग कानुनी थिति र विधिको प्रश्न उठाउँदै सुशासनको अनुभूति गर्न नपाइएको गुनासो गरेका हुन् ।
लोकतान्त्रिक मूल्यमान्यतालाई आत्मसात गरेको संविधान र तदनुरुपका ऐन कानुन भए पनि तिनको कार्यान्वयन पक्ष स्वच्छ र निष्पक्ष हुन नसक्दा जनताले सुशासनको अनुभूति गर्न नपाएका मटिहानी ८ का मतदाता इसराफिल राइनले बताउनुभयो ।
“संविधान छ, कानुन छन् तर कार्यान्वयन पक्ष कमजोर छ । संविधान र कानुनबमोजिम सबै हकअधिकार सुनिश्चित हुनुपर्ने जनताको चाहना छ ।” सबैमा सामाजिक न्यायको सहज पहुँच नहुनु र संविधानले निर्दिष्ट गरेका संवैधानिक हकबाट निमुखा जनता पाखा पर्नु मुख्य समस्याका रूपमा देखिएको उहाँको भनाइ छ ।
पूर्वाधार निर्माणका सरकारी योजनामा बढेको बेथितिले भ्रष्टाचार व्याप्त भएको युवा मतदाता बताउँछन् । कुनै एउटा योजनाका लागि पारदर्शिता र जवाफदेहिता नहुँदा संस्थागत रूपमा नै बेथिति बढेको जलेश्वर ४ का धीरेन्द्र रायले बताउनुभयो । यो बेथिति अन्त्य गर्न राजनीतिक इच्छा शक्ति आवश्यक पर्नेमा जोड दिँदै उहाँले आसन्न निर्वाचनमा दल र उम्मेदवारले भ्रष्टाचार अन्त्यका लागि स्पष्ट खाका प्रस्तुत गर्नसक्नु धारणा राख्नुभयो ।
कृषि यहाँका जनताको प्रमुख पेसा भए पनि सरकारले कृषि क्षेत्रका लागि घोषणा गरेका सुविधा गाउँबस्तीका किसानले पाउन नसकेका मतदाताको गुनासो छ । यस्ता सुविधा पनि पहुँच भएकाहरूले मात्र पाउँदा वास्तविक किसान मर्कामा पर्ने गरेका स्थानीय बस्तीका प्रवीण कर्णले बताउनुभयो । “काममा पारदर्शी र जवाफदेही थिति बसाउन सकिए मात्र सुशासनको अनुभूति हुनसक्छ”, उहाँले भन्नुभयो ।
विकास निर्माणका कामका लागि बन्ने उपभोक्ता समितिदेखि रकम प्रवाह गर्ने अड्डासम्म ‘सेटिङ’ मा काम गरिने परिपाटी हुर्कंदा राजनीतिक क्षेत्र पनि अविश्वासको पात्र बन्दै गएका जलेश्वर(७ बखरीका हरिभुषण रायले धारणा राख्नुभयो । यो परिपाटी अन्त्य गर्न सकिए राजनीतिक क्षेत्रमा मौलाएको बेथिति आफैँ घट्दै उहाँको भनाइ छ ।
“अहिलेको मुलुकको समस्या राजनीतिक क्षेत्रको आर्थिक बेथिति हो”, रायले भन्नुभयो, “अब टालटुले कुराले यो अन्त्य हुँदैन, राजनीतिमा सुदृढ इच्छाशक्तिले यसको बाटो कोर्न सक्छ ।” आसन्न निर्वाचनको मुखमा मतदाता यस्ता सुदृृढ इच्छाशक्तिका उम्मेदवार पर्खी बसेका उहाँको भनाइ छ ।
जलेश्वर नगर क्षेत्र, एकडारा र मटिहानीका बस्ती बर्सेनि बर्खामा डुबानमा पर्दै आएका छन् । रातु र बिगही नदीको ताण्डव रोक्न नदी नियन्त्रणको पक्की तटबन्ध हुनुपर्ने जनताको माग छ । यी समस्या बुझ्नसक्ने र सम्बोधनको आँट देखाउने उम्मेदवार चाहिएको जलेश्वर(८ का धिरु मण्डलले बताउनुभयो ।
आसन्न निर्वाचनका लागि यहाँ २६ स्वतन्त्र र १५ राजनीतिक दलका गरी ४१ जना उम्मेदवार चुनावी मैदानमा उत्रिएका छन् । दलबाट एक र स्वतन्त्र एक गरी दुई जना महिला उम्मेदवार छन् । प्रतिस्पर्धामा रहेका जसपा नेपाल, नेपाली कांग्रेस, नेपाली कम्युनिष्ट पार्टी, नेपाल जनता पार्टी, राष्ट्रिय स्वतन्त्र पार्टी, नेकपा (एमाले), राष्ट्र निर्माण दल र नेपाल सङ्घीय समाजवादी पार्टी छन् ।
यसैगरी, श्रमसंस्कृति पार्टी, उज्यालो नेपाल पार्टी, नेपालका लागि नेपाली पार्टी, राष्ट्रिय प्रजातन्त्र पार्टी, जनमत पार्टी, आमजनता पार्टी र नेकपा (संयुक्त) सहितका दल पनि यहाँ प्रतिस्पर्धामा छन् । निर्वाचनसँग जोडिएर उम्मेदवार र दलका कार्यकर्ताको बढ्दो चहलपहल र बस्तीबस्तीमा सर्वसाधारणले गर्ने चुनावी आँकलनले अहिले महोत्तरी(३ को चुनावी वातावरण बन्दै गएको छ ।
यस क्षेत्रमा यसपालि एक लाख १० हजार ४३६ मतदाता छन् । यो सङ्ख्या जिल्लाका अन्य तीन क्षेत्रभन्दा बढी हो । यस क्षेत्रको भारतसँग २५ किलोमिटर सीमा जोडिएको छ । भारतसँगको सीमासँगैका यहाँका मतदानस्थल संवेदनशील मानिएका छन् । यहाँ ७७ मतदानस्थलमा १४२ मतदान केन्द्रको व्यवस्था गरिएको जिल्ला निर्वाचन कार्यालय महोत्तरीले जनाएको छ । भारतसँग सीमा जोडिएको यस क्षेत्रका मतदानस्थलको उच्च सुरक्षा प्रबन्ध गरिएको प्रमुख जिल्ला अधिकारी इन्द्रदेव यादवले जानकारी दिनुभयो ।
