काठमाडौँ । नेपाल राष्ट्र बैंकले सोमबार २५ अर्ब रुपैयाँ बराबरको ‘नेपाल राष्ट्र बैंक ऋणपत्र २०८२ क’ खुला गरेको थियो। तर, बजारमा पर्याप्त तरलता रहेकाले मागभन्दा ४८ गुणा बढी आवेदन परेको छ।
.gif)
यसमा ३२ वटा बैंक र वित्तीय संस्थाले १२९ बोलकबोल मार्फत १२ खर्ब २० अर्ब ५५ करोड रुपैयाँका लागि आवेदन गरेका छन्। राष्ट्र बैंकका अनुसार, यस ऋणपत्रको औसत ब्याजदर (कुपन रेट) २.६४ प्रतिशत रहेको छ र ब्याज अर्धवार्षिक रूपमा भुक्तानी गरिनेछ।
ऋणपत्र एक वर्षमा परिपक्व हुने छ र वाणिज्य बैंक, विकास बैंक र फाइनान्स कम्पनीले लगानी गर्न सक्ने व्यवस्था गरिएको छ। न्यूनतम लगानी ५ करोड र अधिकतम ५ करोडको गुणक अनुसार आवेदन गर्न सकिन्छ।
राष्ट्र बैंकले जनाएको छ कि यो ऋणपत्र बैंक तथा वित्तीय संस्थामा धितोको रूपमा प्रयोग गर्न सकिने छ र स्वीकृत बोल रकम वैधानिक तरलता अनुपात र खुद तरल सम्पत्ति अनुपातमा गणना गर्न सकिने छ।
यदि काउन्टर पार्टीको खातामा पर्याप्त मौज्दात नभए, त्यस्तो स्वीकृत बोल रकम रद्द गरिनेछ र २.५० प्रतिशत हर्जाना सहित ६ महिना सम्म कुनै पनि बोलकबोलमा सहभागी हुन रोक लगाइने छ।
यो कदम बैंकिङ प्रणालीमा रहेको अधिक तरलतालाई दीर्घकालीन रूपमा व्यवस्थापन गर्ने उद्देश्यले गरिएको हो।
