काबुल । अफगानिस्तानले पाकिस्तानबाट गहुँ र पीठोको आयात पूर्ण रूपमा बन्द गरेको छ । दस वर्षअघि अफगानिस्तानले पाकिस्तानबाट ३० करोड डलरभन्दा बढीको पीठो आयात गर्ने गरेको थियो । तर त्यसपछि बिस्तारै गहुँ आयात घटाउँदै लग्यो । अहिले आएर आयात ठप्पै पारेको छ । हालै दुई देशबिचको तनावपछि अफगान तालिवानले पाकिस्तानसँग व्यापार सम्बन्ध अन्त्य गर्ने कुरा गरेको थियो । अफगानिस्तानले आफ्ना व्यापारीहरूलाई पाकिस्तानको सट्टा अन्य देशहरूसँग व्यापारको बाटो खोज्न निर्देशन नै जारी गर्यो ।
.gif)
विगत केही दशकदेखि, अफगानिस्तानले पाकिस्तानको बाटो भएर सबैभन्दा धेरै व्यापार गर्दै आएको छ, जुन यसको कुल व्यापारको लगभग आधा हो ।२०१५ मा पाकिस्तानले अफगानिस्तानमा ३२ करोड पीठो पठाएको थियो । तर यो अब शून्यमा झरेको अन्तर्राष्ट्रिय र एसियाली बजार अनुगमन एजेन्सीहरूको तथ्याङ्कले देखाएको छ । यी तथ्याङ्कले अफगानिस्तान पिठोको लागि पाकिस्तानमा निर्भर नभएको देखाएको छ । अफगानिस्तानले २०२४ मा उज्बेकिस्तान, काजकिस्तान र रुसबाट ६८ करोड ९० लाख डलरको गहुँ र पिठो किनेको थियो । यो सङ्ख्या २०२५ मा ७५ करोड डलर पुग्ने अनुमान गरिएको छ ।
