काठमाडौं । नेपाल राष्ट्र बैंकले अनलाइन ठगी (Online Scams/Fraud) बाट जोगिन सर्वसाधारणलाई विशेष सतर्कता अपनाउन आग्रह गरेको छ।
.gif)
विद्युतीय माध्यमबाट हुने आर्थिक ठगीबाट बच्न डिजिटल कारोबार गर्दा सावधानी अपनाउनुपर्नेमा राष्ट्र बैंकले जोड दिएको छ। अपरिचित व्यक्ति वा स्रोतबाट प्राप्त शंकास्पद लिंक नखोल्न, व्यक्तिगत तथा बैंकिङ विवरण सुरक्षित राख्न र खातासम्बन्धी गोप्य जानकारी अरूलाई उपलब्ध नगराउन बैंकले सचेत गराएको हो।
पछिल्लो समय अनलाइन माध्यमबाट विभिन्न प्रलोभन देखाएर तथा झुटा विवरण प्रयोग गरेर आर्थिक ठगी हुन सक्ने भएकाले डिजिटल कारोबार गर्दा विशेष ध्यान दिन आवश्यक छ। बैंकिङ कारोबारका क्रममा पासवर्ड, पिन नम्बर तथा ओटीपी (OTP) जस्ता गोप्य विवरण कसैलाई पनि दिनु हुँदैन।
त्यस्तै, सामाजिक सञ्जाल वा अन्य अनलाइन माध्यमबाट प्राप्त हुने शंकास्पद प्रस्ताव, नक्कली सन्देश तथा अपरिचित व्यक्तिको आर्थिक कारोबारसम्बन्धी अनुरोधमा विश्वास गर्नुअघि त्यसको आधिकारिकता जाँच गर्नुपर्छ।
अनलाइन ठगीको जोखिम न्यूनीकरण गर्न सर्वसाधारण स्वयं सचेत हुनुका साथै शंकास्पद कारोबार देखिएमा सम्बन्धित बैंक वा भुक्तानी सेवा प्रदायकलाई तत्काल जानकारी गराउन आवश्यक छ।
डिजिटल वित्तीय कारोबारलाई सुरक्षित बनाउन तथा सम्भावित आर्थिक क्षतिबाट जोगिन नेपाल राष्ट्र बैंकले सर्वसाधारणलाई सतर्क रहन आग्रह गरेको छ।
