काठमाडौं । करिब डेढ महिनादेखि अध्यक्षविहीन रहेको नेपाल स्टक एक्सचेञ्ज (नेप्से) मा नयाँ नेतृत्व आएको छ। अर्थ मन्त्रालयका सहसचिव अमृत लम्साललाई अध्यक्ष नियुक्त गर्दै सरकारले पूँजीबजारको प्रमुख संस्थामा नेतृत्वको रिक्तता अन्त्य गरेको हो।नेपाल स्टक एक्सचेञ्ज (नेप्से) को अध्यक्ष पदमा अर्थ मन्त्रालयका सहसचिव अमृत लम्साल नियुक्त भएका छन्। वैशाख १५ गते तत्कालीन अध्यक्षको राजीनामापछि रिक्त रहेको पदमा सरकारले नयाँ नियुक्ति गरेसँगै नेप्सेले पुनः स्थायी नेतृत्व पाएको छ।अर्थमन्त्री स्वर्णिम वाग्लेको निर्णयअनुसार लम्सालले नेप्सेको सञ्चालक समितिको अध्यक्षको जिम्मेवारी सम्हाल्नेछन्। अध्यक्ष पद खाली रहँदा पूँजीबजारसँग सम्बन्धित विभिन्न नीतिगत निर्णय, संस्थागत सुधार तथा रणनीतिक योजनाहरू प्रभावित भइरहेका थिए।
.gif)
हाल अर्थ मन्त्रालयमा कार्यरत लम्साल वित्तीय तथा सार्वजनिक संस्थागत व्यवस्थापनमा अनुभव भएका अधिकारीका रूपमा परिचित छन्। उनले नेपाल पुनर्बीमा कम्पनी र नेपाल बैंकलगायत संस्थामा सञ्चालकको भूमिका निर्वाह गरिसकेका छन्।नयाँ अध्यक्ष नियुक्तिसँगै नेप्सेमा रोकिएका सुधार कार्यक्रम, बजार पूर्वाधार सुदृढीकरण तथा प्रविधिमैत्री सेवा विस्तारका कामले गति लिने अपेक्षा गरिएको छ। साथै, धितोपत्र बजारको पारदर्शिता, लगानीकर्ता विश्वास अभिवृद्धि र नियामक निकायसँगको समन्वयलाई थप प्रभावकारी बनाउने दिशामा नयाँ नेतृत्वले भूमिका खेल्ने विश्वास गरिएको छ।पूँजीबजारका सरोकारवालाले पनि लम्सालको नेतृत्वमा नेप्सेले बजार विकास, आधुनिकीकरण र संस्थागत सुधारका एजेन्डालाई प्राथमिकताका साथ अघि बढाउने अपेक्षा व्यक्त गरेका छन्।
