काठमाडौँ । नेपाल धितोपत्र बोर्ड (सेबोन) को नयाँ अध्यक्ष पदका लागि ४ जना उम्मेदवारको नाम अन्तिम सूची (सर्टलिस्ट) मा परेको छ । राष्ट्रिय योजना आयोगका सदस्य डा. सञ्जय आचार्यको संयोजकत्वमा गठित सिफारिस समितिले मंगलबार ४ जनाको नाम छनोट गरेको हो।अध्यक्ष पदका लागि कूल ४७ जनाले आवेदन दिएका थिए । तीमध्येबाट समितिले डा. नवराज अधिकारी, विनयदेव आचार्य, मुकुन्द कुमार क्षेत्री र डा. गोपालप्रसाद भट्टलाई सर्टलिस्ट गरेको छ । छनोटमा परेका यी चारै जना उम्मेदवारहरूलाई आगामी जेठ ८ गते अन्तर्वार्ताका लागि बोलाइएको छ ।
.gif)
सर्टलिस्टमा परेका डा. नवराज अधिकारी सेबोनका पूर्वकार्यकारी निर्देशक हुन् । उनले करिब एक महिनाअघि मात्र सेवाबाट अवकाश पाएका थिए । त्यस्तै, विनयदेव आचार्य हाल सेबोनमै कार्यकारी निर्देशकको जिम्मेवारीमा छन् । मुकुन्द कुमार क्षेत्री सेबोनका पूर्वसञ्चालक हुन् भने डा. गोपालप्रसाद भट्ट नेपाल राष्ट्र बैंकका पूर्वकार्यकारी निर्देशक हुन्।सिफारिस समितिको नेतृत्व डा. गुणाकर भट्टले गरेका थिए । तर आवेदन दिनेमध्येका डा. गोपालप्रसाद भट्ट उनका आफ्नै दाजु परेको हुँदा स्वार्थ बाझिने भन्दै डा. गुणाकरले समितिबाट राजीनामा दिएका थिए । उनको राजीनामापछि मात्र योजना आयोगका सदस्य डा. सञ्जय आचार्यलाई समितिको अध्यक्षको जिम्मेवारी दिइएको थियो।
तत्कालीन सरकारले २०८१ मंसिरको दोस्रो साता सन्तोषनारायण श्रेष्ठलाई अध्यक्ष नियुक्त गरेको थियो । तर उनले गत वैशाख ४ गते राजीनामा दिएका थिए । उनले राजीनामा दिएसँगै वैशाख ८ गते बसेको मन्त्रीपरिषद् बैठकले तीन सदस्य सिफारिस समिति गठन गरेर प्रक्रिया अघि बढाएको थियो ।
