प्लेटो । नाइजेरियाको मध्य क्षेत्रमा रहेको एक खानीमा कार्बन मोनोअक्साइड ग्यासका कारण निसास्सिएर कम्तीमा ३७ जना खानी मजदुरको मृत्यु भएको छ। बुधबार बिहान प्लेटो राज्यको वासे क्षेत्रस्थित काम्पानी समुदायमा रहेको बन्द अवस्थाको सिसा खानीमा यो दुःखद घटना भएको हो। रोयटर्सले प्रहरी स्रोत र सुरक्षा प्रतिवेदनलाई उद्धृत गर्दै जनाए अनुसार विषाक्त ग्यासका कारण अन्य २५ जना गम्भीर बिरामी परेका छन्, जसको स्थानीय अस्पतालहरूमा उपचार भइरहेको छ। सरकारी अधिकारीहरूका अनुसार लामो समयदेखि प्रयोगमा नआएको उक्त खानीभित्र जम्मा भएका खनिज पदार्थबाट प्राणघातक ग्यास उत्सर्जन भएको थियो।
.gif)
स्थानीय गाउँलेहरू ग्यासको खतराका बारेमा अनभिज्ञ भई उत्खननका लागि खानीभित्र छिर्दा उक्त विषालु हावा फेरेर घटनास्थलमै ढलेका थिए। नाइजेरियाका ठोस खनिज मन्त्री डेले अलाकेले घटनाको पुष्टि गर्दै अवैध रूपमा खानी पस्ने क्रममा यो दुर्घटना भएको बताएका छन्। थप मानवीय क्षति हुन नदिन सुरक्षा बलले अहिले उक्त क्षेत्रलाई पूर्ण रूपमा घेरा हालेर बन्द गराएको छ।नाइजेरियामा सरकारको निगरानी र सुरक्षा मापदण्ड बिना गरिने अवैध उत्खनन ठुलो समस्याका रूपमा रहँदै आएको छ। सङ्घीय सरकारले घटनाको विस्तृत अनुसन्धानका लागि सो क्षेत्र वरपरका सबै खानी गतिविधिहरू तत्काल निलम्बन गर्न आदेश दिएको छ। प्लेटो राज्य ऐतिहासिक रूपमा खानीका लागि प्रख्यात भए पनि पछिल्ला वर्षहरूमा सुरक्षा अभावका कारण यस्ता दुर्घटनाहरू बढ्दै गएका छन्। गत वर्ष मात्रै जामफारा राज्यमा खानी भत्किँदा १८ जनाको ज्यान गएको थियो।
अफ्रिकी महादेशमा खनिज सम्पत्तिको खोजीका क्रममा हुने यस्ता दुर्घटनाहरूले ठुलो मानवीय मूल्य चुकाउनुपरेको छ। गत महिना मात्रै प्रजातान्त्रिक गणतन्त्र कङ्गोको रुवाया कोल्टान खानी भत्किँदा करिब २०० जनाको मृत्यु भएको थियो। मोबाइल र कम्प्युटरका पाटपुर्जा बनाउन प्रयोग हुने विश्वको १५ प्रतिशत कोल्टान उत्पादन गर्ने उक्त क्षेत्रमा भएको पहिरोले ठुलो क्षति पुर्याएको थियो।
