काठमाडौँ । असोज २३, ‘स्थानीय सेवा, विश्वव्यापी पहुँच’ नाराका साथ आज विश्वका विभिन्न देशमा विश्व हुलाक दिवस मनाइँदैछ। सन् १८७४ मा स्विजरल्याण्डको राजधानी बर्नमा स्थापना गरिएको विश्व हुलाक संघको वार्षिकोत्सवको सम्झनामा हरेक वर्ष अक्टोबर ९ मा यो दिवस मनाइन्छ।
.gif)
यो दिवस मनाउने परम्परा सन् १९६९ मा जापानको टोकियोमा आयोजित विश्व हुलाक संघको महासभाबाट सुरु गरिएको हो। त्यसयता विश्वका धेरै राष्ट्रले हुलाक सेवाको महत्त्व उजागर गर्दै हरेक वर्ष यो दिवस विशेष कार्यक्रमसहित मनाउँदै आएका छन्।
दिवसको अवसरमा विभिन्न देशका हुलाक सेवाहरूले नयाँ हुलाक उत्पादन, सेवा विस्तार र प्रवर्द्धनात्मक कार्यक्रमहरू आयोजना गर्छन्।
यस अवसरमा संयुक्त राष्ट्रसंघका महासचिव एन्टोनियो गुटरेसले एक सन्देश जारी गर्दै हुलाक सेवाले सहरी तथा ग्रामीण क्षेत्रबीचको सम्पर्क कायम राख्न महत्वपूर्ण भूमिका खेलेको बताएका छन्। उनले हुलाक कर्मचारीहरूको सञ्जालले दुर्गम गाउँदेखि शहरसम्म पहुँच पुर्याएर सम्पूर्ण विश्वलाई नजिक ल्याएको उल्लेख गरेका छन्।
