काठमाडौं । खाद्य प्रविधि तथा गुण नियन्त्रण विभागले बजारमा पाइने ‘हट पट’ ब्रान्डका तयारी चाउचाउ फिर्ता गर्न आदेश दिएको छ ।विभागको बजार अनुगमनका क्रममा संकलन गरिएको नमुना परीक्षण गर्दा यो चाउचाउ न्यूनस्तरको पाइएको हो ।
.gif)
पोखरा औद्योगिक क्षेत्रमा रहेको पोखरा नुडल्स प्रालिले उत्पादन गरेको ‘हट पट’ ब्राडको तयारी चाउचाउको ब्याच नम्बर १२७.यु२ को गुणस्तर उपभोग्य स्तरको नरहेको विभागको दाबी छ । उक्त चाउचाउ गत सेप्टेम्बर २०२४ मा उत्पादन गरिएको विभागले जनाएको छ ।
खाद्य स्वच्छता तथा गुणस्तर ऐन, २०८१ अनुसार विभागले उक्त ब्याचका चाउचाउ तुरुन्त बजारबाट फिर्ता गर्न आदेशसमेत दिएको छ । साथसाथै, त्यसको बिक्री, वितरण र प्रयोगसमेत नगर्न र नगराउन सम्बन्धित सबैलाई जानकारी गराइएको छ ।
विभागका खाद्य निरीक्षण अधिकारी नवराज आचार्यले एक सूचना जारी गर्दै भनेका छन्, 'उक्त खाद्य पदार्थ न्यूनस्तरको पाइएकाले ऐनको दफा ३८(२) बमोजिम बिक्री वितरण रोक्का गरिएको छ र सोही ब्याच नम्बरका सम्पूर्ण उत्पादन बजारबाट फिर्ता गरी विवरण विभागमा पेश गर्न आदेश दिइन्छ ।'विभागले उपभोक्तालाई सचेत रहन र आफ्नो सुरक्षाका लागि उक्त उत्पादन प्रयोग नगर्न अनुरोधसमेत गरेको छ ।
