काठमाडौँ । ९० हजार मेट्रिक टन गहुँ आयातका लागि ५८ कम्पनीको आवेदन प्राप्त भएको छ । भारतले दिने कोटा बापतको ९० हजार मेट्रिक टन गहुँ आयातका लागि वाणिज्य आपूर्ति तथा उपभोक्ता संरक्षण विभागले माघ १४ गते व्यापार कम्पनी/फर्महरूलाई आवेदन माग गरेको थियो ।
.gif)
सोहीअनुसार गहुँ आयातका लागि ५८ कम्पनीले उक्त गहुँ आयातका लागि आवेदन दिएका हुन् । विभागका अनुसार प्रत्येक कम्पनीले न्यूनतम १०० मेट्रिक टन देखि १० हजार मेट्रिक टन परिमाण गहुँ आयात गर्न पाउने विभागले जनाएको छ । साथै उक्त गहुँ आयातका लागि इच्छुक फर्म/कम्पनीको चुक्ता पुँजी कम्तीमा एक करोड हुनुपर्ने उल्लेख गरेको विभागले जनाएको छ ।
आयात गर्न इच्छुक फर्म/कम्पनीले आयातका लागि नेशनल को–अपरेटिभ एक्सपोर्ट लिमिटेड (एनसीइएल)लाई शत प्रतिशत अग्रिम भुक्तानी गर्नुपर्ने हुँदा वित्तीय श्रोतको सुनिश्चितता भएको हुनुपर्ने र कोटा प्राप्त भएको मितिले ३ (तीन) महिनाभित्र आयात गरी सक्नुपर्ने विभागले जनाएको छ ।
सरकारले २ लाख मेट्रिक टन गहुँ आयात गर्ने प्रक्रिया अघि बढाएको छ । जसमध्ये १ लाख मेट्रिक टन गहुँ उद्योग विभाग, ९० हजार वाणिज्य विभाग र १० हजार मेट्रिक टन साल्ट ट्रेडिङलाई आयात गर्ने जिम्मा दिइएको छ । वाणिज्य विभागमार्फत आयात हुने उक्त गहुँ व्यापारिक प्रयोजनका लागि भएको जनाइएको छ ।
