राष्ट्रिय स्वतन्त्र पार्टीका उपसभापति डा. स्वर्णिम वाग्लले राष्ट्र बैंकले ल्याउने मौद्रिक नीति बजेटको परिपूरकका रूपमा आउनुपर्ने बताएका छन् ।
.gif)
राष्ट्रिय स्वतन्त्र पार्टीले बिहीवार आयोजना गरेको नीति मन्थन कार्यक्रममा उपसभापति वाग्लेले सरकारले ल्याएको बजेटले मध्यकालीन प्राथमिकता स्पष्ट बनाएकाले अर्थतन्त्रको शिथिलता चिर्न मौद्रिक नीति बजेटको परिपूरकका रूपमा आउनुपर्ने बताएका हुन् ।
डा. वाग्लेले मौद्रिक नीतिलाई वित्त नीतिसरह महत्त्व दिन जरुरी रहेको बताए । उनले अहिले मुलुकको अर्थतन्त्र शिथिल र सुस्त रहेको भन्दै अर्थतन्त्रमा देखिएको शिथिलता उपभोक्ताको माग र पुँजी लगानीमा संकुचन आएको बताए । उनले मुलुकमा आयात, निर्यात र व्यापार घाटा पनि घटेको बताए ।
उनले १४ खर्ब २२ अर्ब राजस्व उठाउने सरकारको लक्ष्यमा असार मसान्तसम्म करिब १० खर्ब मात्रै राजस्व संकलन भएको छ । वित्त नीतिले केही सकारात्मक दिशा औँल्याएको पनि बजेटले अर्थतन्त्रको शिथिलता चिर्न सकेको छैन।
अर्थतन्त्रको कुल मागलाई उकास्न तत्काल गर्नुपर्ने काम मौद्रिक नीतिले गर्न आवश्यक रहेको छ । मौद्रिक नीति कर्जा, ब्याजदर, ऋणीहरूको ब्यालेन्ससिटलाई सहज बनाउने र कर्जा उत्पादनमुखी क्षेत्रमा वृद्धि गर्ने नीति आवश्यक छ ।
