पोखरा । आन्तरिक राजस्व कार्यालय पोखराको अघिल्लो आर्थिक वर्षको तुलनामा गत आर्थिक वर्ष २०८०/८१ मा राजस्व संकलन सात प्रतिशतले वृद्धि भएको छ।
.gif)
विशेषगरी गत वर्ष यहाँको पर्यटकीय क्षेत्र चलायमान हुँदा यसको प्रभाव राजस्व वृद्धिमा देखिएको हो । गत आवमा रु पाँच अर्ब ५७ करोड ५५ लाख राजस्व संकलन गरेको कार्यालयले जनाएको छ ।
कार्यालयले गत वर्ष रु छ अर्ब ३९ करोड ४७ लाख राजस्व उठाउने लक्ष्य राखेकामा लक्ष्यको ८७ दशमलव १९ प्रतिशत प्रगति भएको कार्यालय प्रमुख एवं प्रमुख कर अधिकृत शिव शर्माले जानकारी दिए ।
कार्यालयले आव २०७९/८० मा रु पाँच अर्ब २२ करोड ६० लाख राजस्व उठाएको थियो । अघिल्लो वर्षको तुलनामा गत वर्ष रु ३४ करोड ९५ लाख बढी राजस्व संकलन गरिएको कार्यालयले जनाएको छ ।
आन्तरिक राजस्व कार्यालय पोखराले गत आवमा आयकरतर्फ रु तीन अर्ब ६६ करोड ८७ लाख, मूल्यअभिवृद्धि कर(भ्याट)बाट रु एक अर्ब ७३ करोड ३६ लाख र अन्तःशुल्कतर्फ रु १६ करोड ६७ लाख आम्दानी गरेको थियो ।
“पोखरामा राजस्व वृद्धिमा पर्यटन क्षेत्रको योगदान महत्वपूर्ण रहेको छ । पर्यटन चलायमान बनेकाले सहयोग पुग्यो”, कार्यालय प्रमुख शर्माले भने, “हामीले यस वर्ष पुरानो बक्यौता उठाउन बढी केन्द्रित भएर काम गरेका थियौँ, त्यसले गर्दा राजस्व बढ्यो ।”
