काठमाडौं । युवा तीव्र गतिका बलर राहुल यादवले उत्कृष्ट बलिङ गर्दै चार विकेट लिएपछि नेपाल प्रिमियर लिग (एनपीएल) को तेस्रो सिजनमा काठमाडौं गोर्खाजले जनकपुर बोल्ट्ससामु ११६ रनको लक्ष्य प्रस्तुत गरेको छ।
.gif)
बिहीबार त्रिभुवन विश्वविद्यालय अन्तर्राष्ट्रिय क्रिकेट मैदानमा भएको खेलमा टस जितेर पहिले ब्याटिङ गरेको काठमाडौं १९.३ ओभरमा ११५ रन बनाउँदै अलआउट भयो।
ट्यालेन्ट हन्टबाट उदाएका १६ वर्षीय राहुलले चार ओभरमा ३१ रन खर्चेर चार विकेट लिए। उनले काठमाडौंका प्रमुख ब्याटर साम हेइजलेट, स्मित पटेल, कप्तान करण केसी र मोहम्मद आदिल आलमलाई आउट गर्दै टोलीको ब्याटिङ धराशायी बनाए।
भीम सार्कीले बनाए सर्वाधिक ३३ रन
काठमाडौंका लागि मध्यक्रमका ब्याटर भीम सार्कीले सर्वाधिक ३३ रन बनाए। उनले २९ बलमा चार चौका प्रहार गरे। भीमलाई ललित राजवंशीले स्टम्पिङ आउट गराएका थिए।
त्यस्तै, रसिद खानले १७, ओपनर स्मित पटेलले १३ र सुमित महर्जनले १० रन बनाए। अन्य ब्याटरले उल्लेख्य योगदान दिन सकेनन्।
ओपनर साम हेइजलेट एक रनमा आउट भए भने हरिशंकर शाहले नौ र कप्तान करण केसीले आठ रन बनाए। मोहम्मद आदिल आलम खाता नखोल्दै आउट भए। पाकिस्तानका अलराउन्डर जहानदाद खानले पाँच रन बनाए।
बंगलादेशका रिपोन मोन्डोलले नौ रन बनाए भने शाहब आलम चार रनमा अविजित रहे।
राहुलको उत्कृष्ट लय
जनकपुरका लागि राहुलले चार विकेट लिँदा सैफ हसनले दुई विकेट लिए। माइन अली र ललित राजवंशीले समान एक विकेट हात पारे।
राहुलले यसअघि कर्णाली याक्सविरुद्धको खेलमा दुई विकेट लिएका थिए। यससँगै उनले दुई खेलमा कुल छ विकेट लिइसकेका छन्।
जनकपुर पहिलो जितको खोजीमा
एनपीएलमा काठमाडौं गोर्खाजले आफ्नो पहिलो खेल खेलेको हो। कप्तान करण केसीको नेतृत्वमा मैदान उत्रिएको काठमाडौंले चार विदेशी खेलाडीलाई टोलीमा समावेश गरेको छ।
यता, जनकपुर बोल्ट्स भने प्रतियोगितामा पहिलो जितको खोजीमा छ। यसअघि पहिलो खेलमा जनकपुर कर्णाली याक्ससँग १९ रनले पराजित भएको थियो।
यस खेलमा जनकपुरले जेम्स निसमलाई विश्राम दिएको छ भने हर्मित सिंह र माइन अलीलाई निरन्तरता दिएको छ। साथै, बंगलादेशका सैफ हसन र श्रीलंकाका कुशल परेरालाई टोलीमा समावेश गरेको छ।काठमाडौंले दिएको ११६ रनको लक्ष्य पछ्याउँदै जनकपुर मैदानमा उत्रिनेछ।तस्विरःनयाँपत्रिका
