मुम्बई । बलिउडका दिग्गज अभिनेता नाना पाटेकरको ७५ वर्षको उमेरमा बिहीबार निधन भएको छ । हृदयघातका कारण उनले यो संसार छाडेर गए पनि उनको अभिनयको जादु भने अझै देख्न पाइनेछ ।किनभने पाटेकरले अभिनय गरेका ५ फिल्म अझै रिलिज हुन बाँकी छन् । यी फिल्म हरर–कमेडी, बायोपिक, क्राइम थ्रिलरदेखि रोमान्टिक कमेडी जस्ता फरक–फरक जनरा रहेका छन् ।

शक्ति शालिनी 

नाना पाटेकरको आउँदो फिल्महरूमध्ये ‘शक्ति शालिनी’ लाई उनको अन्तिम ठूलो पर्दाको फिल्म मानिएको छ । आदित्य सरपोतदारको निर्देशनमा बनिरहेको यो फिल्म म्याडक फिल्म्सको ‘हरर–कमेडी युनिभर्स’ को हिस्सा हो । फिल्ममा विशाल जेठ बाको पनि मुख्य भूमिका छ ।फिल्मको कथा ‘शक्ति’ नामकी एक साधारण महिलाको वरिपरि घुम्छ, जो ‘शालिनी’ नामको बदला लिने आत्माको रक्षक बन्छिन् । नानाको भूमिकाबारे धेरै जानकारी नआए पनि केही रिपोर्टका अनुसार उनी तान्त्रिकको भूमिकामा देखिनेछन् । फिल्म २४ डिसेम्बर २०२६ मा रिलिज हुने तय भएको छ ।

ईठा

लक्ष्मण उतेकरको निर्देशनमा बनिरहेको ‘ईठा’ महाराष्ट्रकी प्रख्यात लोक कलाकार विठाबाई नारायणगावकरको जीवनबाट प्रेरित छ । उनी तमाशा र लावणी जस्ता लोक कलासँग जोडिएकी प्रसिद्ध कलाकार थिइन् ।फिल्ममा श्रद्धा कपुर मुख्य भूमिकामा छिन् भने उनको साथमा रणदीप हुड्डा, अनन्त जोशी र नाना पाटेकर पनि देखिनेछन् । यो फिल्म ४ डिसेम्बर २०२६ मा सिनेमा घरमा रिलिज हुने तयारीमा छ ।

द कन्फेसन अफ मेरी

‘द कन्फेसन अफ मेरी’ एक क्राइम ड्रामा  हो । फिल्ममा नाना पाटेकरले ‘फादर बेनेडिक्ट’ नामक क्याथोलिक पादरीको भूमिका निभाएका छन् । उनीमाथि एक महिलाको हत्याको आरोप लाग्छ ।अनन्त नारायण महादेवनद्वारा निर्देशित यो फिल्म सन् १९६६ मा केरलामा भएको चर्चित ‘मदथारुवी हत्याकाण्ड’ बाट प्रेरित छ, जसमा मरियाकुट्टी नामकी महिलाको हत्या भएको थियो । फिल्ममा नानाबाहेक आदिल हुसेन, आशिष विद्यार्थी, गौतम रोडे र नेहा महाजन जस्ता कलाकारहरू छन् ।

कुकु की कुण्डली

रोमान्टिक कमेडीमा आधारित ‘कुकु की कुण्डली’ पनि पाटेकरका रिलिज हुन बाँकी फिल्ममध्ये एक हो । शरण शर्माको निर्देशनमा बनिरहेको यस फिल्ममा भुवन बाम र वामिका गब्बी मुख्य भूमिकामा छन् ।फिल्मको कथा कुण्डलीका कारण सम्बन्धमा उब्जिने समस्या र त्यसले जोडी तथा उनीहरूको परिवारमा पार्ने असरमा आधारित छ । यसमा नाना पाटेकरको पनि महत्त्वपूर्ण भूमिका छ ।

वेदान्त

नाना पाटेकरको आउँदो फिल्म ‘वेदान्त’ पनि हो । राजेश्वर पाण्डे राजको निर्देशनमा बनिरहेको यस फिल्ममा नानाको साथमा विक्रान्त मेस्सी, सन्दिपा धर र मुकेश तिवारी देखिनेछन् ।फिल्मको कथा, नानाको भूमिका र रिलिज मितिबारे धेरै जानकारी सार्वजनिक गरिएको छैन ।