काठमाडौँ । ब्रिटिस एजुकेसन ग्रुप (बीईजी) ले सोल्टी काठमाडौँमा आयोजित संयुक्त दीक्षान्त समारोहमार्फत आफ्नो ‘क्लास अफ २०२६’ का विद्यार्थीहरूको उपलब्धि उत्सवका रूपमा मनाएको छ । समूहअन्तर्गतका चारवटै संस्थाका स्नातक, अभिभावक, प्राध्यापक तथा विशिष्ट अतिथिहरूको उपस्थितिमा उक्त कार्यक्रम सम्पन्न भएको हो ।द ब्रिटिस कलेज (टीबीसी) को १२औँ दीक्षान्त समारोहलाई समूहस्तरीय उत्सवका रूपमा आयोजना गरिएको थियो । समारोहमा द ब्रिटिस कलेज, ब्रिटिस इन्टरनेसनल कलेज, ब्रिटिस मोडल कलेज र ब्रिटिस प्रोफेसनल कलेजका स्नातक विद्यार्थीहरू सहभागी थिए ।

ए लेभलदेखि व्यावसायिक योग्यताका साथै व्यवसाय, कम्प्युटिङ, सूचना प्रविधि र लेखा विषयका विभिन्न स्नातक तथा स्नातकोत्तर तहका विद्यार्थीहरूलाई कार्यक्रममा सम्मान गरियो । यसअन्तर्गत एक्जिक्युटिभ एमबीए, एमबीए, एमएससी आईटी, एमएससी एडभान्स्ड कम्प्युटर साइन्स, एमएससी प्रोफेसनल एकाउन्टेन्सी, एसीसीए, बीबीए, बीएससी (अनर्स) कम्प्युटिंग, बीएससी (अनर्स) साइबर सिक्युरिटी एन्ड डिजिटल फरेन्सिक्स तथा ए लेभलका विद्यार्थीहरू सम्मिलित थिए ।दुई सत्रमा विभाजित समारोहमा विद्यार्थीहरूले समूहका अन्तर्राष्ट्रिय शैक्षिक साझेदारहरू लिड्स बेकेट युनिभर्सिटी (एलबीयू), युनिभर्सिटी अफ द वेस्ट अफ इङ्ल्यान्ड (यूडब्ल्यूई), कील युनिभर्सिटी, युनिभर्सिटी अफ लन्डन, एसीसीए र क्याम्ब्रिज इन्टरनेसनलबाट आफ्ना उपाधि तथा योग्यता प्राप्त गरे ।स्नातक विद्यार्थीहरूको शैक्षिक जुलुसबाट सुरु भएको कार्यक्रममा नेपाल र बेलायतको राष्ट्रगान गाइएको थियो । त्यसपछि ब्रिटिस एजुकेसन ग्रुपका प्रमुख कार्यकारी अधिकृत (ग्रुप सीईओ) राजेन कंडेलले परम्परागत पानस बालेर १२औँ दीक्षान्त समारोहको औपचारिक उद्घाटन गरे ।

समारोहलाई सम्बोधन गर्दै सीईओ कंडेलले भने, “क्लास अफ २०२६ ले टीबीसीका ४,००० भन्दा बढी र ब्रिटिस एजुकेसन ग्रुपका १०,००० भन्दा बढी स्नातक रहेको फराकिलो अल्युम्नाइ सञ्जालमा आफूलाई जोडेका छन् । थप अध्ययन, व्यावसायिक करिअर र नयाँ अवसरतर्फ अघि बढ्दा पनि कलेज र एकअन्तर्गतका सदस्यहरूसँग निरन्तर जोडिइरहन आग्रह गर्दछु ।” उनले विद्यार्थीहरूको निरन्तरको मिहिनेत, परिवार तथा प्राध्यापकहरूको सहयोगप्रति आभार व्यक्त गरे ।कार्यक्रममा द ब्रिटिस कलेजका सल्लाहकार पल क्लिभ्स एमबीई तथा बेलायतस्थित भुटानका प्रथम मानार्थ महावाणिज्यदूत एवं टीबीसीका पूर्व सल्लाहकार माइकल रटल्यान्ड ओबीईले स्नातकहरूलाई उनीहरूको शैक्षिक तथा व्यावसायिक जीवनको सफलताको शुभकामना दिए । लिड्स बेकेट युनिभर्सिटीका वरिष्ठ प्रवक्ता डेभ चेस्ली विश्वविद्यालयको शैक्षिक साझेदारीको प्रतिनिधित्व गर्दै सहभागी भएका थिए ।

त्यस्तै अन्तर्राष्ट्रिय शैक्षिक समुदायका तर्फबाट युनिभर्सिटी अफ द वेस्ट अफ इङ्ल्यान्डका उपकुलपति प्रोफेसर स्टिभ वेस्ट सीबीई, कील युनिभर्सिटीका उपकुलपति प्रोफेसर केभिन शेकशेफ र युनिभर्सिटी अफ लन्डनका साइमन क्लियरीले भिडियो सन्देशमार्फत बधाई ज्ञापन गरे ।समारोहमा शैक्षिक उपाधि वितरणका साथै उत्कृष्ट विद्यार्थीहरूलाई ‘एक्सलेन्स अवार्ड्स’ प्रदान गरियो । विभिन्न कार्यक्रमका विद्यार्थी प्रतिनिधिहरूले आफ्ना नुभव र स्नातकसम्मको यात्राबारे भनाइ राखेका थिए ।द ब्रिटिस कलेजका कन्ट्री डाइरेक्टर अरुण कंडेलको धन्यवाद ज्ञापनपछि औपचारिक कार्यक्रम समापन भएको थियो ।