काठमाडौँ । रसुवाको भोटेकोशी नदीमा आएको भीषण बाढी र त्यसले टिमुरे तथा स्याफ्रुबेँसी क्षेत्रमा पुर्याएको क्षतिप्रति अर्थ मन्त्रालयले चासो देखाएको छ । अर्थमन्त्री डा. स्वर्णिम वाग्लेले बाढी प्रभावित क्षेत्रमा खोज तथा उद्धार कार्यलाई प्रभावकारी बनाउन रसुवा भन्सार कार्यालय र मातहतका निकायहरूसँग प्रत्यक्ष समन्वय सुरु गरेका हुन् ।
.gif)
केही घण्टाअघि भएको भोटेकोशीमा जलस्तर बढेर टिमुरे र स्याफ्रुबेँसी आसपासको क्षेत्रमा ठुलो सङ्कट पैदा भएको छ । बाढीपछिको अवस्थालाई सम्बोधन गर्न अर्थ मन्त्रालयको उच्च नेतृत्व टोली सक्रिय भएको छ । अर्थमन्त्री डा. वाग्लेको नेतृत्वमा मन्त्रालयका सचिव डा. घनश्याम उपाध्याय, भन्सार विभागका महानिर्देशक यमलाल भुसाल र अर्थ मन्त्रालय प्रशासनको टोलीले खोज, उद्धार र राहतका लागि आवश्यक समन्वय गरिरहेको मन्त्रालयले जनाएको छ।
चीनसँगको प्रमुख व्यापारिक नाका रसुवागढी र आसपासका भन्सार कार्यालयहरू बाढीको उच्च जोखिममा रहेकाले त्यहाँ रहेका कर्मचारी, सुरक्षाकर्मी र भौतिक संरचनाको सुरक्षाका लागि मन्त्रालयले विशेष निर्देशन दिएको छ ।
