काठमाडौं, २१ साउन । कृषि विकास बैंक लिमिटेड (एडीबीएल) ले आर्थिक वर्ष २०८२।८३ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ। विवरणअनुसार बैंकको खुद नाफा, सञ्चालन नाफा तथा वितरणयोग्य मुनाफामा उल्लेख्य गिरावट आएको छ भने निक्षेप र कर्जा विस्तारमा भने वृद्धि भएको देखिएको छ।
.gif)
बैंकको खुद नाफा अघिल्लो आर्थिक वर्षको ३ अर्ब ७३ करोड २४ लाख रुपैयाँबाट २९.५२ प्रतिशत घटेर २ अर्ब ६३ करोड ६ लाख रुपैयाँमा सीमित भएको छ। त्यस्तै, खुद ब्याज आम्दानी पनि ९ अर्ब ४४ करोड ७४ लाख रुपैयाँबाट घटेर ९ अर्ब १२ करोड १५ लाख रुपैयाँमा पुगेको छ।
समीक्षा अवधिमा बैंकको सञ्चालन नाफा ५ अर्ब २१ करोड ८ लाख रुपैयाँबाट घटेर ३ अर्ब ९४ करोड ३५ लाख रुपैयाँमा झरेको छ। यसैबीच, कर्जा नोक्सानी व्यवस्था भने ६३ करोड ७ लाख रुपैयाँबाट बढेर १ अर्ब ७१ करोड ६० लाख रुपैयाँ पुगेको छ, जसले नाफामा दबाब परेको देखिन्छ।
नियमनकारी समायोजनपछि बैंकको वितरणयोग्य नाफा पनि उल्लेख्य रूपमा घटेको छ। अघिल्लो वर्ष २ अर्ब ४३ करोड ३० लाख रुपैयाँ रहेको वितरणयोग्य नाफा घटेर ५७ करोड २६ लाख रुपैयाँमा सीमित भएको छ। सञ्चित नाफा तथा नगद लाभांश समायोजनपछि बैंकको कुल वितरणयोग्य नाफा १ अर्ब २६ करोड २१ लाख रुपैयाँ रहेको छ। यसअनुसार प्रतिशेयर वितरणयोग्य नाफा ६ रुपैयाँ ५४ पैसा कायम भएको बैंकले जनाएको छ।
बैंकको चुक्ता पूँजी १९ अर्ब ७३ करोड ८२ लाख रुपैयाँ रहेको छ भने कुल इक्विटी ३८ अर्ब ९० करोड रुपैयाँ पुगेको छ।
यद्यपि बैंकको व्यवसाय विस्तार भने सकारात्मक देखिएको छ। असार मसान्तसम्म बैंकको निक्षेप १८.३६ प्रतिशतले बढेर ३ खर्ब ४७ अर्ब २१ करोड रुपैयाँ पुगेको छ। त्यस्तै, कर्जा प्रवाह पनि १६.२४ प्रतिशतले वृद्धि भएर २ खर्ब ४७ अर्ब १४ करोड रुपैयाँ पुगेको वित्तीय विवरणमा उल्लेख छ।
