काठमाडौँ । प्रविधिको द्रुत विकाससँगै संगीत सुन्नका लागि मात्र प्रयोग गरिने इयरबड्स अचेल मानिसको व्यक्तिगत सहयोगी (पर्सनल असिस्टेन्ट) मा परिणत हुन थालेका छन्। नयाँ युगका यी इयरबड्सले प्रयोगकर्ताको वरपरको वातावरण बुझ्ने, कुराकानीको विश्लेषण गर्ने, स्वास्थ्यसँग जोडिएका संकेतहरू पहिचान गर्ने र रियल टाइममा आवश्यक निर्णय लिने क्षमता राख्छन्। कुनै समय केवल आवाज सुनाउने माध्यम मात्र रहेका इयरबड्समा आर्टिफिसियल इन्टेलिजेन्स (एआई), अत्याधुनिक सेन्सर र मेसिन लर्निङ जस्ता प्रविधि जोडिएपछि यसको स्वरूप र उपयोगिता पूर्ण रूपमा बदलिएको छ। अचेलका इयरबड्समा एडाप्टिव नोइज क्यान्सलेसन,भ्वाइस कमान्ड, लाइभ ट्रान्सक्रिप्सन, मुटुको धड्कन र शरीरको तापक्रम मापन गर्ने तथा लोकेसन र एक्टिभिटी ट्र्याकिङ जस्ता अत्याधुनिक सुविधाहरू उपलब्ध हुन थालेका छन्।

यसरी काम गर्छन् एआई इयरबड्स

एआई इयरबड्समा जडान गरिएका माइक्रोफोन, सेन्सर र एआई प्रणालीले प्रयोगकर्ताको वरपरको सूचनालाई निरन्तर संकलन र विश्लेषण गरिरहेका हुन्छन्। प्रयोगकर्ताले के सुनिरहेको छ, कोसँग कुरा गरिरहेको छ, वरपर कत्तिको होहल्ला छ वा ऊ कुन स्थानमा छ भन्ने जस्ता विवरणहरू यी इयरबड्सले तत्कालै प्रोसेस गर्छन्। साना तर छिटो लिनुपर्ने निर्णयहरू, जस्तै आवश्यक परेको खण्डमा आवाज सानो-ठूलो बनाउने वा पृष्ठभूमिमा रहेको अनावश्यक होहल्ला हटाउने काम एआई आफैँले गर्छ।

बजारमा आएका केही अत्याधुनिक डिभाइसहरू

विश्वका प्रतिष्ठित प्रविधि कम्पनीहरूले एआई सुविधायुक्त विभिन्न इयरबड्स र एयरबड्स बजारमा ल्याएका छन्:

• एप्पल एयरपड्स प्रो: यसले पारदर्शिता र बाहिरी आवाजलाई आफैँ सन्तुलन गर्छ। यसमा संगीत सुन्दै गर्दा प्रयोगकर्ताले बोल्न सुरु गर्ने बित्तिकै संगीतको आवाज आफैँ कम हुन्छ। 
• पिक्सेल बड्स प्रो २: गुगलको यस डिभाइसमा ४० भन्दा बढी भाषाहरूमा लाइभ अनुवाद गर्ने सुविधा रहेको छ। यो डिभाइस भ्वाइस कमान्डबाट चल्छ र वरपरको कोलाहल अनुसार अडियोको स्तर परिवर्तन हुन्छ। 
• जेबीएल लाइभ बिम ३: अडियोका साथै फिटनेस र सक्रिय प्रयोगकर्ताहरूलाई लक्षित गरी यो डिभाइस बनाइएको छ। यसमा ६ वटा माइक्रोफोन जडान गरिएका छन्, जसले आवश्यकता अनुसार बाहिरी आवाज स्पष्ट सुन्न मद्दत गर्छन्। 
• सामसङ ग्यालेक्सी बड्स-३ प्रो: यसले आकस्मिक साइरन वा ट्राफिक जस्ता सुन्नैपर्ने महत्त्वपूर्ण आवाजहरूलाई भित्र आउन दिन्छ भने बाँकी अनावश्यक होहल्लालाई पूर्ण रूपमा ब्लक गरिदिन्छ। 
• बिट्स पावरबिट्स प्रो २: यसमा पिपिजी सेन्सरहरू जडान गरिएका छन्, जसले मुटुको धड्कन मापन गर्छन्। शारीरिक व्यायाम (वर्कआउट) का क्रममा यसले गर्ने मुटुको धड्कनको मापन स्मार्टवाच जत्तिकै सटिक हुने दाबी गरिएको छ। 

एआई इयरबड्सका चार मुख्य विशेषताहरू

• इन्टेलिजेन्ट नोइज म्यानेजमेन्ट: अत्यधिक भीडभाड भएको स्थानमा पनि यसले अनावश्यक होहल्लालाई हटाएर कुरा गरिरहेको व्यक्तिको आवाज मात्र स्पष्ट रूपमा सुनाउँछ।
• रियल टाइम ट्रान्सलेसन: फरक-फरक भाषा बोल्ने दुई व्यक्तिबिच यसको सहयोगले प्रत्यक्ष कुराकानी गर्न सम्भव हुन्छ। उदाहरणका लागि, एकजनाले नेपालीमा बोल्दा अर्को व्यक्तिले आफ्नो भाषामा अनुवाद सुन्न सक्छ।
• एडाप्टिभ अडियो पर्सनालाइजेसन: एआई प्रविधिले प्रयोगकर्ताको कानको बनावट अनुसार अडियो प्रोफाइललाई आफैँ परिवर्तन गरिदिन्छ, जसले गर्दा सुन्ने अनुभव उत्कृष्ट हुन्छ।
• हेल्थ र प्रोडक्टिभिटी ट्र्याकिङ: यसले मुटुको धड्कन र शरीरका अन्य संकेतहरूको विश्लेषण गर्नुका साथै बैठकमा भएका कुराकानीलाई लिखित रूपमा उतार्ने र त्यसलाई नोटमा बदल्ने काम समेत गर्छ।