नवलपरासी (बर्दघाट सुस्ता पश्चिम) २२ पुस । अत्यधिक चिसो र लामो समयदेखि जारी शीतलहरका कारण नवलपरासी जिल्लामा व्यावसायिक रूपमा पालिएका माछा मर्न थालेका छन्।
.gif)
पाल्हीनन्दन गाउँपालिका–४ का कृष्णबहादुर सहानीले चिसोका कारण माछा जोगाउन नसकेको बताए। विगत १० वर्षदेखि छ बिघा क्षेत्रफलमा व्यावसायिक माछापालन गर्दै आएका सहानीका अनुसार पोखरीको तापक्रम अत्यधिक घटेपछि माछा मर्न थालेका हुन्। चिसो बढेपछि माछाले दाना खान पनि छोडेको उनले जानकारी दिए।
त्यसैगरी, प्रतापपुर गाउँपालिका–२ का भवानी शङ्कर यादवले १६ बिघामा व्यावसायिक माछापालन गर्दै आएका छन्। उनले अत्यधिक चिसोका कारण करिब २० क्विन्टल बैखी जातका माछा मरेको बताए। यसले आफूलाई ठूलो आर्थिक क्षति पुगेको यादवको भनाइ छ।
किसानहरूले चिसो नियन्त्रणका लागि आवश्यक प्रविधि र सरकारी सहयोगको माग गरेका छन्। निरन्तर चिसो यस्तै रहिरहेमा जिल्लाका अन्य माछा पालक किसानहरू पनि प्रभावित हुने जोखिम रहेको उनीहरूको चिन्ता छ।
