काठमाडौं । भारतले सन् २०२६ फेब्रुअरीमा कृत्रिम बुद्धिमत्ता (एआई) विषयक एआई इम्प्याक्ट समिट आयोजना गर्ने भएको छ । यो समिटले एआईलाई जनसाधारणको हितका लागि प्रयोग गर्ने भारत सरकारको प्रतिबद्धतालाई उजागर गर्ने उद्देश्य लिएको छ ।भारतीय सञ्चार तथा सूचना प्रविधि मन्त्री अश्विनी वैष्णवले संसदमा जानकारी दिँदै भने, 'प्रधानमन्त्री नरेन्द्र मोदीको दृष्टिकोणअनुसार प्रविधिको उपयोग सबै वर्गका नागरिकको सेवामा गर्नुपर्छ । यो समिट सोही दृष्टिकोणलाई मूर्तरूप दिने महत्त्वपूर्ण अवसर हुनेछ ।'
.gif)
समिटमा स्वास्थ्य, शिक्षा, कृषि, जलवायु परिवर्तन र सुशासनजस्ता क्षेत्रमा एआईको प्रयोगमार्फत वास्तविक समस्या समाधानमा जोड दिइनेछ ।मन्त्री वैष्णवका अनुसार नवप्रवर्तनलाई विस्तारयोग्य बनाउन भारत सरकारले देशको एआई पूर्वाधार विस्तार गर्नेतर्फ पनि काम गरिरहेको छ । यस अन्तर्गत GPU (Graphics Processing Unit) कम्प्युटिङ शक्तिमा पहुँच सुधार्ने र AIKosh Datasets Platform लाई अझ सुदृढ बनाउने योजना अघि सारिएको छ ।
हाल AIKosh प्लेटफर्ममा १,००० भन्दा बढी डाटासेट र २०८ एआई मोडेलहरू उपलब्ध छन् । सरकारको लक्ष्य आगामी वर्षसम्म यस प्लेटफर्मलाई अनुसन्धानकर्ता, स्टार्टअप र विकासकर्ता समुदायका लागि अझ सुलभ र उपयोगी बनाउने रहेको छ । यो समिट भारतको एआई क्षेत्रमा बढ्दो क्षमता, नवप्रवर्तन र ‘प्रविधि जनकल्याणका लागि’ भन्ने दृष्टिकोणलाई विश्वसमक्ष प्रस्तुत गर्ने अवसरका रूपमा हेरिएको छ ।
