काठमाडौँ । काठमाडौँ महानगरपालिकाले महानगर क्षेत्रभित्र जडान हुने सीसीटिभी क्यामराका लागि आवश्यक नेटवर्क सुविधा उपलब्ध गराउन नेपाल टेलिकमसँग सम्झौता गरेको छ ।
.gif)
शुक्रबार काठमाडौँ प्लाजामा आयोजित कार्यक्रममा महानगरका प्रमुख प्रशासकीय अधिकृत सरोज गुरागाईं र टेलिकम वागमती प्रादेशिक कार्यालयका निर्देशक इन्दल यादवले सम्झौता पत्रमा हस्ताक्षर गरेका हुन् ।
सम्झौता अनुसार टेलिकमले अप्टिकल फाइबर नेटवर्क तथा एफटीटीएच (फाइबर टु द होम) मार्फत महानगर र वडा कार्यालयहरूका सीसीटिभी क्यामराका लागि लोकल इन्ट्रानेट सेवा उपलब्ध गराउनेछ । साथै, नियमित मर्मत सम्भार, आकस्मिक क्षतिपछि पुनःस्थापना, प्राविधिक सहायता, नेटवर्क निगरानी र उच्च गतिको व्याण्डविथ आपूर्ति गर्ने जिम्मेवारी पनि टेलिकमले लिनेछ ।
सीसीटिभी क्यामरा, राउटर लगायतका उपकरणहरूको व्यवस्था महानगरपालिकाले गर्नेछ भने टेलिकमले निगरानी कक्ष (सर्भेलेन्स रुम) मा दृश्यहरू पु¥याउने व्यवस्था मिलाउनेछ ।
सम्झौता कार्यक्रममा प्रमुख प्रशासकीय अधिकृत गुरागाईंले प्रविधिको प्रयोगबाट काठमाडौँलाई सुरक्षित र स्मार्ट सहर बनाउने लक्ष्यका साथ सहकार्य अघि बढेको बताए । सूचना प्रविधि विभागका प्रमुख अनिरुद्र नेपालका अनुसार, टेलिकमसँगको सञ्जालका कारण महानगरले तत्काल विद्यमान सीसीटिभी दृश्यहरू पनि प्राप्त गर्न सक्नेछ ।
यो सहकार्य काठमाडौँलाई स्वचालित, सुरक्षित र व्यवस्थित बनाउन प्रविधि आधारित प्रणाली विकास र विस्तारतर्फको महत्वपूर्ण कदमका रूपमा हेरिएको छ ।
