काठमाडौँ । भदौ २८, काठमाडौँ महानगरपालिकाले जेनजीहरूको प्रदर्शनका कारण बन्द रहेका विद्यालयहरू आगामी सोमबार (३० भदौ) देखि पुनः सञ्चालन गर्ने निर्णय गरेको छ। गत २३ र २४ गतेको प्रदर्शनका कारण कक्षा अवरुद्ध भएपछि विद्यालयहरू अस्थायी रूपमा बन्द गरिएको थियो।
.gif)
महानगरको निर्णय अनुसार शिक्षक तथा विद्यालयका अन्य कर्मचारीहरूलाई आइतबार (२९ भदौ) बाटै विद्यालयमा उपस्थित भएर प्रशासनिक कार्य, सरसफाई लगायतका गतिविधि सञ्चालन गर्न निर्देशन दिइएको छ।
साथै, विद्यालयमा कुनै भौतिक क्षति पुगेको भए त्यसको विवरण तुरुन्त महानगरपालिकामा उपलब्ध गराउन पनि आग्रह गरिएको छ।
महानगरले अभिभावकहरू सँग सम्पर्क गरी विद्यार्थीहरूको अवस्था बुझ्न समेत विद्यालयहरूलाई निर्देशन दिएको छ। अवस्था सामान्य नहुँदा सम्म अभिभावकहरूले आफ्ना बालबालिकालाई विद्यालय पठाउनुपर्ने बाध्यता नराख्ने महानगरको भनाइ छ।
विद्यालयमा आउन नसक्ने विद्यार्थीहरूको लागि भर्चुअल कक्षा सञ्चालन गरी पठनपाठनलाई निरन्तरता दिने व्यवस्था गरिएको महानगरले जनाएको छ।
