काठमाडौँ । भदौ २६, मुलुकभर उत्पन्न असहज परिस्थितिका कारण त्रिभुवन विश्वविद्यालय (त्रिवि) अन्तर्गतका आंगिक तथा सम्बन्धन प्राप्त क्याम्पसहरूको नियमित पठनपाठन छठ पर्वपछि मात्रै सुरु हुने भएको छ।
.gif)
त्रिविको सूचना तथा जनसम्पर्क महाशाखाले एक सूचना जारी गर्दै नियमित कक्षा कार्तिक ११ गतेदेखि मात्रै सञ्चालन हुने जानकारी दिएको हो। हालको असहज अवस्थाका कारण कक्षा स्थगित गरिएका दिनहरूलाई आगामी हिउँदे बिदाबाट कटौती गरिने बताइएको छ।
सूचना अनुसार, भदौ २९, ३० र ३१ गते, साथै असोज १, २, ५ र कार्तिक ९ गते विश्वविद्यालयका सम्पूर्ण क्याम्पसहरूमा पठनपाठन बन्द रहनेछ।
महाशाखाले जारी गरेको सूचनामा भनिएको छ, मुलुकभर विद्यमान असामान्य परिस्थितिका कारण आगामी हिउँदे बिदाबाट कटौती गर्ने गरी तोकिएका मितिहरूमा त्रिभुवन विश्वविद्यालयको सम्पूर्ण पठनपाठन कार्य बन्द गर्ने निर्णय गरिएको र नियमित पठनपाठन कार्तिक ११ गतेदेखि सञ्चालन हुने व्यहोरा सम्बन्धित सबैमा जानकारी गराइन्छ।
हालै मुलुकभर चलेको युवा आन्दोलन र त्यसपछिको अस्थिर अवस्थाका कारण शैक्षिक गतिविधिमा अवरोध आएको थियो। विश्वविद्यालयले सोही परिस्थितिलाई मध्यनजर गर्दै कक्षाहरू पछि सार्ने निर्णय लिएको हो।
