विराटनगर । कोसी प्रदेश अनुसन्धान तथा प्रशिक्षण प्रतिष्ठान, कलवलगुढी झापाको आर्थिक वर्ष २०८२/८३ का लागि कुल १० करोड ४७ लाख ५० हजार रुपैयाँको बजेट स्वीकृत गरेको छ । बुधबार प्रतिष्ठानको चौथो परिषद् बैठक मुख्यमन्त्री हिक्मत कुमार कार्कीको अध्यक्षतामा बसेको थियो । बैठकले वार्षिक बजेट स्वीकृत गरेको हो ।
.gif)
बैठकमा प्रदेश सरकारबाट प्राप्त दुई करोड ७० लाख रुपैयाँको अनुदान र प्रतिष्ठानको १६ लाख रुपैयाँ आन्तरिक आम्दानी जोडेर दुई करोड ८६ लाख रुपैयाँको कार्यक्रम तय गरिएको छ । साथै, प्रदेश तथा स्थानीय शासन सवलीकरण कार्यक्रमअन्तर्गत सात करोड ६१ लाख ५० हजार रुपैयाँबराबरको कार्यक्रम पनि स्वीकृत गरिएको छ । प्रतिष्ठानका अनुसार, यो बजेट प्रदेशसभाबाट पारित भइसकेको छ ।
बैठकमा मुख्यमन्त्री कार्कीले कर्मचारीहरूको दक्षता अभिवृद्धि गर्न ‘स्मार्ट’ तालिम सञ्चालन गर्नु आवश्यक रहेको धारणा राखे । उनले प्रतिष्ठानलाई विश्वसनीय र जनमानसले चिन्ने संस्था बनाउँदै प्रविधि सँगसँगै अघि बढ्नुपर्ने आवश्यकता औँल्याए ।
