काठमाडौँ -ललितपुरको मानभवनस्थित सुयोग बहुउद्देश्यीय सहकारी संस्था लिमिटेडका अध्यक्ष सुनिल महर्जनसहित ३ जना थुनामा छन् । जिल्ला प्रहरी परिसर ललितपुरले उनीहरुविरुद्ध सहकारीको रकम अपचलन गरेको मुद्दामा अनुसन्धान गरिरहेको छ ।
.gif)
ललितपुर महानगरपालिका–२० घर भएका अध्यक्ष सुनिल महर्जन, ललितपुर–१२ मंगलबजार घर भएकी ६० वर्षीया मालिका महर्जन र भक्तपुरको सूर्यविनायक नगरपालिका–७ घर भएका अर्पण कवा असार १६ र १७ मा पक्राउ परेका हुन् ।
सहकारीमा उपाध्यक्षको भूमिकामा रहेकी मालिका चाहिँ सुनिल महर्जनको मामाकी छोरी हुन् । मालिका सहकारीको हिसाबबारे अनभिज्ञ रहेको अनुसन्धानमा संलग्न अधिकृतहरू बताउँछन् । ३७ वर्षीय अर्पण कवा संस्थाको सचिव हुन् । महर्जन २०७० देखी हालसम्म सो सहकारीको अध्यक्ष छन् ।
सहकारीका संचालकहरुविरुद्ध १३६ जनाले जाहेरी दिएका छन् । ललितपुरका एसएसपी शेखर खनालका अनुसार जाहेरवालाहरुले जम्मा गरेको ८ करोड ९८ लाख २८ हजार बचत फिर्ता पाउनुपर्ने माग गरेका छन् । सहकारीमा एउटै परिवारका सदस्यहरूले १ करोड सम्मा जम्मा गरेको भेटिएको छ ।
अध्यक्ष सुनिल महर्जनले संस्थामा कुल डिपोजिट ४५ करोड रहेको अनुसन्धान अधिकृतहरूसँग बताएका छन् । अनुसन्धानमा संलग्न एकजना प्रहरी भन्छन्,‘१५ करोड फिर्ता गरिसकेको महर्जनको भनाइ छ ।’
८ जनाविरुद्ध पक्राउ पुर्जी
सुयोग सहकारीको रकम अपचलनमा संलग्न आरोपमा ८ जनालाई पक्राउ गर्न ललितपुर जिल्ला अदालतले प्रहरीलाई अनुमति दिएको छ । भक्तपुर नगरपालिका–१२ घर भएकी उपाध्यक्ष गिता सिख्वाल, ललितपुर महानगरपालिका–२० घर भएकी रेस्मि शिल्पकार, चापागाउँ शाखाका व्यवस्थापक विष्णु संजेल, लेखा समिति सदस्य भूपेन्द्र महर्जन र सञ्चालक समिति सदस्य रविन महर्जनविरुद्ध पक्राउ पुर्जी जारी भएको छ ।
सञ्चालक समिति सदस्य अछामको जनालीकोट घर भएका नर बहादुर साउद, महालक्ष्मी नगरपालिका–८ घर भएका रन्जित श्रेष्ठ र ललितपुर महानगरपालिका–९ घर भएका राजमोहन अवालेलाई पनि पक्राउ गर्न अदालतले ललितपुर प्रहरीलाई अनुमति दिएको छ ।
