एजेन्सी । डोनाल्ड ट्रम्प अमेरिकाको ४७ औं राष्ट्रपति बनेका छन्। उनले सोमबार राति नेपालीय समय अनुसार १० स्४५  बजे अमेरिकी संसद क्यापिटल हिलमा पद तथा गोपनियताको शपथ लिएका हुन्। उनलाई सर्वोच्च अदालतका न्यायाधीश जोन रोबर्ट्सले शपथ ग्रहण गराए।

शपथ ग्रहण समारोहमा ट्रम्पकी श्रीमती मेलानियाले बाइबल समातेर उभिएकी थिइन्। ट्रम्पको शपथपछि, संसदको क्यापिटल रोटुन्डा हल केही समयसम्म तालीको गडगडाहटले गुन्जियो। ट्रम्प २०१७ देखि २०२१ सम्म संयुक्त राज्य अमेरिकाको ४५ औं राष्ट्रपति थिए। उनीभन्दा अगाडि रिपब्लिकन नेता जेडी भान्सले अमेरिकाको ५० औं उपराष्ट्रपतिको रूपमा शपथ लिएका थिए।

शपथ ग्रहणपछि ट्रम्पले ३० मिनेटसम्म राष्ट्रका नाममा सम्बोधन गरे। आफ्नो पहिलो भाषणमा उनले भने, अमेरिकाको स्वर्ण युग भर्खरै सुरु भएको छ। यस दिनदेखि, हाम्रो देश फेरि समृद्ध हुनेछ र विश्वभर सम्मानित हुनेछ।

अबको केही समयपछि हामी मेक्सिकोको खाडीको नाम परिवर्तन गरेर संयुक्त राज्य अमेरिकाको खाडी राख्नेछौं, ट्रम्पले भने। पानामा नहरको बारेमा उनले भने, ‘यस नहरका कारण हामीमाथि धेरै नराम्रो व्यवहार गरिएको छ। यो नहर कहिल्यै पनि पानामा देशलाई उपहारको रूपमा दिनु हुँदैनथ्यो। आज चीनले पनामा नहर सञ्चालन गरिरहेको छ। हामीले यो चीनलाई दिएनौं। हामीले यो पानामा देशलाई दियौं। हामी यसलाई फिर्ता लिनेछौं।’

उनले भने, हामी अवैध आप्रवासीहरूको प्रवेशमा प्रतिबन्ध लगाउनेछौं र समात्ने र छोड्ने प्रणाली अन्त्य गर्नेछौं। हाम्रो देशमाथिको यो विनाशकारी आक्रमण रोक्न म दक्षिणी सिमानामा सेना पठाउनेछु।’

उनले आफ्नो भाषणमा भने, म अमेरिकामा सबै सरकारी सेन्सरशिप तुरुन्तै रोक्न र अभिव्यक्ति स्वतन्त्रता पुनर्स्थापित गर्न कार्यकारी आदेशमा पनि हस्ताक्षर गर्नेछु। आजदेखि अमेरिकी सरकारको आधिकारिक नीति हुनेछ पुरुष र महिला दुई लिङ्ग मात्र हुनेछन्।’

१० घोषणाहरू

१.अन्य देशहरूमा भन्सार लगाउन बाह्य राजस्व सेवाको गठन।
२. शिक्षा प्रणाली र स्वास्थ्य प्रणालीमा परिवर्तन ल्याउने ।
३.अवैध आप्रवासीहरूको प्रवेशमा प्रतिबन्ध लगाउने र समात्ने र छोड्ने प्रणाली अन्त्य गर्ने।
४. घुसपैठ रोक्न मेक्सिकोको सीमामा आपतकाल घोषणा गरिनेछ।
५.लागूऔषध माफियालाई विदेशी आतंकवादी संगठन घोषणा गरिने।
६.विदेशी गिरोहहरूलाई निर्मूल पार्न विदेशी शत्रु ऐन, १७९८ लागू गर्ने ।
७. मेक्सिकोको खाडीको नाम परिवर्तन गरी अमेरिकाको खाडी राखिने ।
८.ट्रान्सजेन्डर प्रणालीको अन्त्य हुनेछ, पुरुष र महिला गरी दुई लिङ्ग मात्र हुने।
९. विद्युतीय सवारी साधनको बाध्यता अन्त्य गर्ने ।
१०.पानामा नहर पानामाबाट फिर्ता लिइने ।