निसिन, जापान । नेपालले १२ वर्षपछि अफगानिस्तानलाई टी–२० अन्तर्राष्ट्रिय क्रिकेटमा पराजित गरेको छ। जापानमा जारी २०औँ एसियाली खेलकुद अन्तर्गत शुक्रबार निसिनस्थित कोरोगी स्पोर्ट्स पार्कमा भएको खेलमा नेपालले अफगानिस्तानलाई ५ विकेटले हराएको हो।
.gif)
अफगानिस्तानले दिएको १०३ रनको लक्ष्य नेपालले १८.३ ओभरमा ५ विकेट गुमाएर पूरा गर्यो। नेपालको जितमा सन्दीप जोराले ३४, रोहित पौडेलले ३३ तथा कप्तान दीपेन्द्रसिंह ऐरीले १५ रनको योगदान दिए।
यसअघि टस जितेर पहिले ब्याटिङ गरेको अफगानिस्तानले निर्धारित २० ओभरमा ७ विकेट गुमाउँदै १०२ रन बनाएको थियो। फैसल खान अहमदजायी र निजिबुल्लाह जार्डनले समान ३० रन बनाए भने नंगेलिया खानले अविजित १७ रन जोडे।
अफगानिस्तानलाई कम योगफलमा रोक्ने क्रममा कुशल भुर्तेलले ४ ओभरमा २१ रन खर्चेर ४ विकेट लिए। ललितनारायण राजवंशीले ३ विकेट लिए।
अफगानिस्तानविरुद्ध नेपालको यो १२ वर्षपछिको टी–२० जित हो। यसअघि नेपालले सन् २०१४ को टी–२० विश्वकपमा अफगानिस्तानलाई ९ रनले हराएको थियो। चटगाउँमा भएको उक्त खेलमा नेपालले १४१ रन बनाउँदा अफगानिस्तान १३२ रनमै सीमित भएको थियो।
त्यसपछि सन् २०१४ कै एसियाली खेलकुदमा नेपाल अफगानिस्तानसँग क्वार्टरफाइनलमा पराजित भएको थियो। यसपटक एसियाली खेलकुदमै भएको भेटमा नेपालले उक्त हारको बदला लिएको छ।
समूह ‘ए’मा नेपालसँगै अफगानिस्तान र आयोजक जापान छन्। नेपालले शनिबार जापानसँग प्रतिस्पर्धा गर्नेछ। समूहबाट दुई टोली क्वार्टरफाइनलमा पुग्नेछन्।
अफगानिस्तानविरुद्धको जितपछि कप्तान दीपेन्द्रसिंह ऐरीले टेस्ट राष्ट्रलाई पराजित गर्नु महत्वपूर्ण उपलब्धि भएको बताए। उनले कुशल भुर्तेल र ललितनारायण राजवंशीको प्रभावकारी बलिङका कारण अफगानिस्तानलाई दबाबमा राख्न सफल भएको उल्लेख गरे। जापानविरुद्ध पनि जित निकाल्दै क्वार्टरफाइनल पुग्ने लक्ष्य रहेको उनको भनाइ थियो।
