काठमाडौँ । नेपाल राष्ट्र बैंकले रु १ हजार दरको नयाँ बैंकनोट प्रचलनमा ल्याउने भएको छ। केन्द्रीय बैंकले ‘सिरिज २०२५’ अन्तर्गतको रु १ हजार दरको बैंकनोट प्रचलनमा ल्याउने सम्बन्धमा सूचना जारी गरेको हो।
.gif)
नयाँ बैंकनोटमा प्रचलित डिजाइन तथा सुरक्षा विशेषताहरूलाई निरन्तरता दिइएको छ। बैंकनोटको छपाइ वर्ष ‘सिरिज २०२५’ उल्लेख गरिएको छ भने नोटमा नेपाल राष्ट्र बैंकका तर्फबाट आवश्यक हस्ताक्षर तथा अन्य विवरण समावेश गरिएका छन्।
राष्ट्र बैंकका अनुसार नयाँ सिरिजको बैंकनोट प्रचलनमा आएपछि यसअघि प्रचलनमा रहेका रु १ हजार दरका बैंकनोटसमेत कानुनी रूपमा प्रचलनमा रहनेछन्।
केन्द्रीय बैंकले नयाँ नोट सर्वसाधारणले बैंक तथा वित्तीय संस्थामार्फत प्राप्त गर्न सक्ने जनाएको छ। नोटको कारोबार गर्दा यसको सुरक्षा विशेषता पहिचान गरी मात्र प्रयोग गर्न पनि राष्ट्र बैंकले आग्रह गरेको छ।
नयाँ बैंकनोटको प्रचलनसँगै नेपाली मुद्रा प्रणालीमा थप नयाँ सिरिज समावेश हुने भएको छ।
