नयाँ दिल्ली । हालैका दिनहरूमा भारतमा चिनीको भाउ निरन्तर बढिरहेको छ । घरेलु बजारमा चिनीको उपलब्धता बढाउन अनि मूल्य नियन्त्रण गर्न केन्द्र सरकारले नयाँ सिजनमा ऊखुबाट इथानोलको उत्पादनमा सीमा तोक्ने वा अस्थायी रोक लगाउनेबारे विचार गरिरहेको समाचारमा उल्लेख छ ।अक्टोबरदेखि शुरु हुने चिनीको नयाँ सिजनका लागि यस्तो कदम चाल्नेबारे सरकारले छलफल गरिरहेको बताइएको छ । सरकारले घरेलु बजारमा चिनीको उपलब्धता बढाउन र मूल्यलाई कीर्तिमानी स्तरमा उक्लिनबाट रोक्न यस्तो गर्ने ठानिएको छ । यसका लागि इथानोलको उत्पादनमा हेरफेरबारे विचार भइरहेको सरकार र उद्योगसँग सम्बद्ध स्रोतले बताएको भन्दै भारतीय सञ्चार माध्यमहरूले समाचार छापेका छन् ।
.gif)
भारतमा गएको एक महीनामा चिनीको भाउ १० प्रतिशतसम्म बढिसकेको छ । घरेलु बजारमा चिनीको अभाव र चाडपर्वको मौसममा चिनीको बढ्दो माग पनि यसको एउटा कारण मानिएको छ । महाराष्ट्र र कर्नाटक जस्ता प्रमुख चिनी उत्पादक राज्यमा यो वर्ष निकै कम पानी पर्यो । यसले आगामी सिजनमा ऊखु र चिनीको उत्पादन घट्ने आशंका गरिएको छ ।यतिबेला बजारमा चिनीको पर्याप्त उपलब्धता सरकारको सबैभन्दा ठूलो चुनौती बनेको छ । विद्यमान सिजनमा ३० लाख मेट्रिक टन बराबरको चिनी उत्पादन हुन सक्ने ऊखुलाई इथानोल उत्पादन गर्न प्रयोग गरिएको थियो । यो भनेको कूल उत्पादित चिनीको १० प्रतिशत हो ।
