राजविराज । सप्तरीको छिन्नमस्ता गाउँपालिकाले आफ्नै कार्यालयबाट करदाता सेवा सञ्चालनमा ल्याएको छ। करदाता सेवा कार्यालय राजविराजले प्रदान गर्दै आएका सेवाहरू अब छिन्नमस्ता गाउँपालिकाको कार्यालयबाटै उपलब्ध हुन थालेका हुन्।यो सेवा सुरु भएसँगै गाउँपालिकावासीले करसम्बन्धी कामका लागि सदरमुकाम राजविराज धाउनुपर्ने बाध्यताको अन्त्य भएको गाउँपालिका अध्यक्ष विद्यानन्द चौधरीले जानकारी दिए । अब गाउँपालिकाबाटै व्यवसायिक प्यान, व्यक्तिगत स्थायी लेखा नम्बर र कर चुक्ता प्रमाणपत्र जस्ता महत्त्वपूर्ण सेवाहरू सहज रूपमा प्राप्त गर्न सकिने उनले बताए ।
.gif)
चौधरीका अनुसार स्थानीय तहबाटै सेवा प्रवाह हुँदा नागरिकको समय बचत हुनुका साथै यातायात र अन्य अतिरिक्त खर्चमा समेत उल्लेख्य कमी आउनेछ। 'स्थानीय सरकारको पहुँचलाई प्रभावकारी र नागरिकमैत्री बनाउँदै जनतालाई छिटो-छरितो सेवा दिने दिशामा यो एउटा महत्त्वपूर्ण उपलब्धि हो,' अध्यक्ष चौधरीले भने । नेपाल सरकारको स्थानीय तहबाटै स्थायी लेखा नम्बर (प्यान) वितरण गर्ने र आन्तरिक राजस्व विभागका सेवाहरूलाई स्थानीय तहमार्फत नै प्रवाह गर्ने नीति अनुरूप यो कार्यको सुरुवात गरिएको हो।
