नवलपुर । पूर्वी नवलपरासी (नवलपुर) को विनयी त्रिवेणी गाउँपालिकामा मंगलबार साँझ आएको विनाशकारी हावाहुरीसहितको वर्षाले व्यापक क्षति पुर्याएको छ । गाउँपालिकाको वडा नम्बर १ अन्तर्गत पर्ने विभिन्न गाउँहरूमा हावाहुरीले २० वटाभन्दा बढी घरको छाना उडाएर ठुलो नोक्सानी पुर्याएको हो ।
.gif)
हावाहुरीले सबैभन्दा बढी क्षति वडा नम्बर १ को बगुवन गाउँमा पुर्याएको छ । स्थानीय बासिन्दा बुद्धराज विश्वकर्माका अनुसार बगुवनमा मात्रै १५ वटा घरको जस्तापाता र फुसको छाना हावाहुरीले गर्दा भुइँमा खसालेको छ । छाना उडाएलगत्तै परेको मूसलधारे पानीले गर्दा घरभित्र भण्डारण गरेर राखिएको अन्नपात, खाद्यान्न र ओढ्ने–ओछ्याउने लत्ताकपडाहरू पूर्ण रूपमा भिजेका छन् । अन्न र कपडा सबै नष्ट भएपछि प्रभावित परिवारलाई अहिले बिहानको छाक टार्न र बस्नका लागि ठुलो समस्या परेको छ ।
यसैगरी, हावाहुरीले बगुवनमा रहेको स्थानीय आधारभूत विद्यालयको खानेपानीको ट्याङ्की समेत ढालेर पूर्ण रूपमा क्षतिग्रस्त बनाइदिएको छ । ट्याङ्की ढलेपछि विद्यालय र आसपासका क्षेत्रमा खानेपानीको हाहाकार मच्चिएको छ । हावाहुरीका कारण विद्युतका पोल र तारहरूमा क्षति पुग्दा हिजो साँझदेखि नै सो क्षेत्रमा बिजुली बत्ती अवरुद्ध भएको छ । विनयी त्रिवेणी गाउँपालिका वडा नम्बर १ का वडा अध्यक्ष दीपक पौडेलका अनुसार पालिकाको बगुवनमा १५ घर, सिसेनी गाउँमा ५ घर र अन्य केही स्थानमा पनि घरहरूको छाना उडेको विवरण प्राप्त भएको छ । वडा कार्यालयले अहिले प्रहरी र स्थानीय प्रतिनिधिहरूको सहयोगमा प्रभावित क्षेत्रमा भएको क्षतिको थप विस्तृत विवरण सङ्कलन गरिरहेको छ र पीडितहरूलाई तत्काल राहत उपलब्ध गराउनका लागि पहल थालिएको छ ।
