इस्लामाबाद । पाकिस्तानको निर्यात मे महिनामा उल्लेखनीय रूपमा बढेको छ भने आयातमा कमी आएपछि मासिक व्यापार घाटामा ठूलो सुधार देखिएको छ।पाकिस्तान ब्युरो अफ स्ट्याटिस्टिक्स (पीबीएस) ले सार्वजनिक गरेको पछिल्लो व्यापार तथ्यांकअनुसार मे महिनामा निर्यात ९.५९ प्रतिशतले बढेर २ अर्ब ७० करोड अमेरिकी डलर पुगेको छ।अघिल्लो महिना अर्थात् अप्रिलमा पाकिस्तानको निर्यात २ अर्ब ४७ करोड डलर रहेको थियो। निर्यात वृद्धिसँगै आयातमा आएको गिरावटले व्यापार सन्तुलनमा सकारात्मक प्रभाव पारेको तथ्यांकले देखाएको छ।
.gif)
पीबीएसका अनुसार मे महिनामा आयात अघिल्लो महिनाको तुलनामा २१.४५ प्रतिशतले घटेर ५ अर्ब २९ करोड डलरमा सीमित भएको छ। अप्रिलमा आयात उल्लेख्य रूपमा उच्च रहेकामा मेमा कमी आएपछि मासिक व्यापार घाटा ३९.४३ प्रतिशतले घटेर २ अर्ब ५९ करोड डलरमा झरेको छ।वार्षिक तुलना गर्दा पनि पाकिस्तानको निर्यातमा सामान्य वृद्धि देखिएको छ। सन् २०२५ को मे महिनामा २ अर्ब ६७ करोड डलर रहेको निर्यात सन् २०२६ को सोही अवधिमा १.२६ प्रतिशतले बढेर २ अर्ब ७० करोड डलर पुगेको छ।त्यसैगरी, आयात भने गत वर्षको मे महिनाको ५ अर्ब ६६ करोड डलरबाट ६.६३ प्रतिशतले घटेर ५ अर्ब २९ करोड डलरमा झरेको छ।
यद्यपि मे महिनाको तथ्यांक सकारात्मक देखिए पनि चालु आर्थिक वर्षको समग्र व्यापार अवस्थाले भने चुनौतीपूर्ण संकेत गरेको छ।
आर्थिक वर्ष २०२५–२६ को जुलाईदेखि मेसम्मको ११ महिनाको अवधिमा पाकिस्तानको कुल निर्यात अघिल्लो आर्थिक वर्षको सोही अवधिको तुलनामा ५.६ प्रतिशतले घटेको छ। उक्त अवधिमा निर्यात २९ अर्ब ५६ करोड डलरबाट घटेर २७ अर्ब ९ करोड डलरमा सीमित भएको छ।
यसै अवधिमा आयात भने ५.९४ प्रतिशतले बढेर ६२ अर्ब ६६ करोड डलर पुगेको छ। अघिल्लो वर्षको तुलनामा आयात बढ्नु र निर्यात घट्नुका कारण व्यापार घाटा थप विस्तार भएको हो।
पीबीएसको तथ्यांकअनुसार आर्थिक वर्षको पहिलो ११ महिनामा पाकिस्तानको व्यापार घाटा १७.४८ प्रतिशतले बढेर ३४ अर्ब ७६ करोड डलर पुगेको छ।
