काठमाडौं । माछापुच्छ्रे हिमालको काखमा रहेको कास्कीको माछापुच्छ्रे गाउँपालिका–८, कालीमाटीमा जन्मिएका पूर्णभक्त दाहाल आज नेपालको पाककला क्षेत्रमा एक स्थापित नामका रूपमा परिचित छन्। सामान्य आर्थिक अवस्थाको परिवारमा हुर्किएका दाहालले संघर्ष, मेहनत र समर्पणका बलमा कार्यकारी शेफदेखि प्रशिक्षक र नेतृत्वदायी व्यक्तित्वसम्मको यात्रा तय गरेका छन्।

खाद्य शब्दकोश ‘फलाङ खाद्य शब्दकोश’का लेखक शिव न्यौपानेले प्रस्तुत गरेको दाहालको जीवनकथाले सपना, संघर्ष र सफलताको प्रेरणादायी सन्देश दिन्छ।

बाल्यकालमा गोर्खा सैनिक बन्ने सपना बोकेका दाहाल एक समय केवल १६० रुपैयाँ लिएर गाउँ छोडेर हिँडेका थिए। तर परिस्थितिले उनलाई फरक बाटोमा डोर्‍यायो। गोर्खा बन्ने सपना पूरा नभएपछि उनले पाककला क्षेत्रलाई आफ्नो भविष्य बनाउने निर्णय गरे, जुन निर्णय आज उनको पहिचान र सफलताको आधार बनेको छ।

सन् २००६ देखि आतिथ्य तथा पाककला क्षेत्रमा सक्रिय दाहालले नेपालका विभिन्न चारतारे होटल तथा प्रतिष्ठित रेस्टुरेन्टहरूमा काम गर्दै व्यापक अनुभव हासिल गरेका छन्। हाल उनी पोखराको लेकसाइडस्थित प्याराडिसो पोखरामा कार्यकारी शेफका रूपमा कार्यरत छन्।

उनको व्यावसायिक दक्षता र समर्पणको परिणामस्वरूप उनले सन् २०१९ मा CTEVT र गेट कलेजद्वारा संयुक्त रूपमा आयोजित नेपाल फुड नेशनल कम्पिटिसनमा गण्डकी प्रदेशको प्रतिनिधित्व गर्दै प्रथम स्थान हासिल गरेका थिए।

दाहाल केवल सफल शेफ मात्र होइनन्, एक समर्पित प्रशिक्षक पनि हुन्। उनले विभिन्न कलेजहरूमा पाककला प्रशिक्षकका रूपमा काम गर्दै नयाँ पुस्ताका शेफहरूलाई मार्गदर्शन गरिरहेका छन्। साथै, विभिन्न सरकारी परियोजनामार्फत आतिथ्य तथा खाद्य सेवा क्षेत्रको विकासमा योगदान दिँदै आएका छन्।

व्यावसायिक क्षमता अभिवृद्धिका लागि उनले अष्ट्रेलियाको TAFE Level 3 को अध्ययन सन् २०२४ मा नेपालमै बसेर पूरा गरेका छन्। साथै HACCP Level 2 र ISO 22000 जस्ता अन्तर्राष्ट्रिय प्रमाणपत्र हासिल गर्दै खाद्य सुरक्षा र गुणस्तर व्यवस्थापनप्रति आफ्नो प्रतिबद्धता प्रमाणित गरेका छन्।

हालै साथी शेफहरूको विश्वासका आधारमा उनी नेपाली शेफ्स सोसाइटीको गण्डकी प्रदेश समितिमा नेतृत्वदायी जिम्मेवारीमा चयन भएका छन्। यो जिम्मेवारीले उनको व्यावसायिक सफलता मात्र नभई पाककला समुदायमा उनले कमाएको सम्मान र योगदानलाई पनि उजागर गरेको छ।

पूर्णभक्त दाहालको जीवनयात्रा संघर्ष, निरन्तर सिकाइ, अनुशासन र आत्मविश्वासको प्रेरणादायी उदाहरण हो। सीमित स्रोतसाधनबाट सुरु भएको उनको यात्रा आज हजारौं युवाका लागि प्रेरणाको स्रोत बनेको छ। उनले प्रमाणित गरेका छन् कि स्पष्ट लक्ष्य, कडा मेहनत र दृढ संकल्प भए कुनै पनि सपना सफलतामा बदल्न सकिन्छ।