तेहरान । इरानले अमेरिकासँग अन्तरिम सम्झौता हुनेबित्तिकै रोक्का भएर बसेको आफ्नो १२ अर्ब अमेरिकी डलर बराबरको सम्पत्ति तत्काल उपलब्ध गराउन माग गरेको छ ।इरानी अर्धसरकारी फार्स न्यूज एजेन्सीका अनुसार कतारमा भएको वार्तामा सहभागी इरानी प्रतिनिधिमण्डलसँगै गएका पत्रकार सइद अजोरलुले यस्तो जानकारी दिएका हुन् ।
.gif)
उनका अनुसार वार्ता यस्तो चरणमा पुगेको छ कि रोकिएको सम्पत्तिमा पहुँचमा कुनै अवरोध महसुस गर्यो भने इरान सम्झौताबाट पछि हट्न सक्नेछ । अजोरलुको भनाइ उद्धृत गर्दै समाचारमा भनिएको छ, ‘१२ अर्ब डलरमा पहुँचको संरचनाले नै सम्झौता कार्यान्वयनको ग्यारेन्टीको काम गर्नुपर्छ । यदि सम्पत्तिमा पहुँच अवरुद्ध भयो भने इरान सम्झौताबाट बाहिरिन सक्ने अवस्था रहन्छ ।’उनका अनुसार माग गरिएको १२ अर्ब डलरमध्ये ६ अर्ब डलर इरानको पहिलेदेखि रोकिएको सम्पत्ति हो । बाँकी ६ अर्ब डलर भने यस चरणमा थप रूपमा मुक्त गरिनुपर्ने रकम हो । यसअघि तस्निम न्यूज एजेन्सीले तेहरान र वाशिङ्टनबिच अन्तरिम सम्झौता भएमा कुल २४ अर्ब डलर बराबरको इरानी सम्पत्ति फुकुवा हुन सक्ने जनाएको थियो । त्यसमध्ये आधा रकम सम्झौता घोषणा हुनेबित्तिकै उपलब्ध गराइने बताइएको थियो ।
समाचारअनुसार कतारले उक्त रकमको ग्यारेन्टरको भूमिका निर्वाह गर्न सहमति जनाएको थियो । अजोरलुले भने, ‘हामी वार्तामा जाने, सम्झौता गर्ने र फेरि अर्काे युद्ध सुरु भएमा आफ्नै सम्पत्तिमा पहुँच गुमाउने अवस्था चाहँदैनौँ ।’यद्यपि कतारले भने आफूले सम्झौता सम्पन्न गराउन इरानलाई १२ अर्ब डलर प्रस्ताव गरेको भन्ने समाचारको खण्डन गरेको छ ।
