काठमाडौं । साताको दोस्रो कारोबार दिन मंगलबार नेपाल स्टक एक्सचेञ्ज (नेप्से) परिसूचक बढेर बन्द भएको छ। सोमबार गिरावट देखिएको बजार यस दिन पुनः सुधार हुँदै २२.२१ अंकले बढेर २७७७.५८ विन्दुमा पुगेको हो।यस दिन सेन्सेटिभ इण्डेक्स २.७८ अंक, फ्लोट इण्डेक्स १.३६ अंक र सेन्सेटिभ फ्लोट इण्डेक्स १.०१ अंकले वृद्धि भएका छन्।बजारमा १३ उपसमूहमध्ये १२ उपसमूह हरियालीमा रहे भने एक उपसमूह सामान्य घटेको छ। विशेषगरी वित्त उपसमूहमा लगानीकर्ताको आकर्षण उच्च देखिएको छ, जसको परिसूचक ६.०३ प्रतिशतले बढेको छ। अन्य उपसमूह पनि बढेका छन्, जसमा व्यापार र निर्जीवन बीमा समूह १ प्रतिशतभन्दा बढीले उकालो लागेका छन्। उत्पादन तथा प्रशोधन उपसमूह भने सामान्य घटेको छ।
.gif)
सूचक बढेपनि कारोबार रकम भने घटेको छ। सोमबार ५ अर्ब ६१ करोड रुपैयाँ बराबरको कारोबार भएको बजारमा मंगलबार ३४६ स्टकको १ करोड १३ लाखभन्दा बढी कित्ता सेयर ५ अर्ब २६ करोड रुपैयाँभन्दा बढीमा किनबेच भएको छ।कालिन्चोक हाइड्रोपावर को सेयर मूल्य ६४ रुपैयाँ ९० पैसाले बढ्दै ४९८ रुपैयाँ २० पैसामा पुगेर सकारात्मक सर्किट लेभलमा कारोबार भयो। त्यस्तै सेन्ट्रल फाइनान्स को सेयर साढे १३ प्रतिशतभन्दा बढी र क्रेष्ट माइक्रो लाइफ इन्स्योरेन्स को सेयर साढे १० प्रतिशतभन्दा बढीले बढेको छ।
कारोबार रकमका आधारमा यस दिन पनि आँखु खोला जलविद्युत कम्पनी शीर्ष स्थानमा रह्यो, जसको ४६ करोड ७६ लाख रुपैयाँभन्दा बढीको कारोबार भएको छ। त्यस्तै नेपाल पुनर्बीमा कम्पनी को साढे २६ करोड रुपैयाँभन्दा बढी र रिडी पावर कम्पनीको पनि उल्लेखनीय कारोबार भएको छ।विश्लेषकहरूका अनुसार सूचक बढे पनि कारोबार रकम घट्नुले बजारमा तत्कालीन उत्साह भए पनि दीर्घकालीन विश्वास अझै पूर्ण रूपमा स्थिर नभएको संकेत गर्छ। वित्त समूहमा देखिएको तीव्र वृद्धि भने अल्पकालीन रोटेशनल लगानीको प्रभाव हुन सक्ने अनुमान गरिएको छ।
