काठमाडौँ, ३ जेठ । वैदिक ज्योतिषीय गणनाअनुसार प्रत्येक करिब ३२ महिना १६ दिन (झण्डै २८–३२ महिनाको अन्तराल) मा आउने अधिकमास (मलमास) शनिबारदेखि सुरु भएको छ। यो अवधि आगामी असार १ गतेसम्म रहने बताइएको छ।
.gif)
ज्योतिषशास्त्र अनुसार सौर र चान्द्रमासबीच समन्वय मिलाउनका लागि संक्रान्ति नपर्ने अतिरिक्त महिनालाई मलमास भनिन्छ। यस अवधिमा कुनै अधिपति देवता नहुने भएकाले यसलाई ‘पुरुषोत्तममास’ पनि भनिन्छ भन्ने पौराणिक मान्यता छ। यसअघि २०८० सालको साउन महिनामा अधिकमास परेको थियो।
धर्मशास्त्रविद्हरूका अनुसार मलमास अवधिभर विवाह, व्रतबन्ध, गृहनिर्माण, गृहप्रवेश लगायतका शुभकार्य तथा नयाँ व्रत प्रारम्भ नगर्नु शास्त्रीय नियम मानिन्छ। तर दैनिक पूजा–पाठ, जप, ध्यान तथा नियमित धार्मिक कर्म भने निरन्तर गर्न सकिने उल्लेख गरिएको छ।
यसैबीच, मलमासको अवसरमा काठमाडौं उपत्यकास्थित मत्स्यनारायण मन्दिरमा शनिबारदेखि एक महिनासम्म विशेष मेला सुरु भएको छ। मन्दिर परिसरमा दैनिक पूजाआराधना, धार्मिक प्रवचन तथा पुरुषोत्तममास माहात्म्य वाचन हुने परम्परा रहिआएको छ।
काठमाडौं आसपास रहेको यस मन्दिरमा मलमास अवधिभर भगवान् नारायणको दर्शन तथा आराधनाका लागि ठूलो संख्यामा भक्तजनहरूको भीड लाग्ने विश्वास गरिएको छ। भक्तजनहरूले यस अवधिमा दर्शन–पूजन गरे पाप नाश भई पुण्य प्राप्त हुने धार्मिक मान्यता रहेको छ।
