काठमाडौँ, २० वैशाख । नेपालको अग्रणी मदिरा उत्पादक कम्पनी हिमालयन डिष्टिलरी लिमिटेडले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ। सार्वजनिक विवरणअनुसार कम्पनीले बिक्री आम्दानीसँगै खुद नाफामा समेत उल्लेखनीय वृद्धि हासिल गरेको छ।
.gif)
कम्पनीले चालु आर्थिक वर्षको चैत मसान्तसम्म ३ अर्ब ९ करोड १४ लाख रुपैयाँ खुद बिक्री आम्दानी गरेको छ। गत आर्थिक वर्षको सोही अवधिमा यस्तो आम्दानी २ अर्ब ७८ करोड ५० लाख रुपैयाँ रहेको थियो। यस अवधिमा कम्पनीको बिक्री आम्दानी करिब ११ प्रतिशतले वृद्धि भएको देखिन्छ।
बिक्रीमा आएको वृद्धिसँगै कम्पनीको नाफामा पनि सकारात्मक प्रभाव परेको छ। समीक्षा अवधिमा हिमालयन डिष्टिलरी लिमिटेडले ८५ करोड १३ लाख रुपैयाँ खुद नाफा कमाएको छ, जुन गत वर्षको तुलनामा १५.१६ प्रतिशतले बढी हो।
मदिरा बजारमा बढ्दो माग, ब्रान्ड विस्तार तथा प्रभावकारी बजार रणनीतिका कारण कम्पनीको वित्तीय प्रदर्शनमा सुधार आएको विश्लेषकहरू बताउँछन्। आगामी दिनमा पनि बजार विस्तार र उत्पादन विविधीकरण मार्फत कम्पनीले अझ राम्रो प्रदर्शन गर्ने अपेक्षा गरिएको छ।
