काठमाडौँ । २५ देखि ४५ वर्षको उमेर समूहमा स्वास्थ्यमा ध्यान दिनु सबैभन्दा महत्त्वपूर्ण हुन्छ। यो उमेरमा शरीरका धेरै महत्त्वपूर्ण अङ्ग र प्रणालीहरूको नियमित परीक्षण गर्न आवश्यक हुन्छ, जसले गर्दा रोगहरूलाई सुरुवाती चरणमै पहिचान गर्न सकियोस्। धेरैजसो मानिसहरू कुनै गम्भीर समस्या परेपछि मात्र डाक्टरकहाँ जाने गर्छन्। तर नियमित स्वास्थ्य परीक्षणले भविष्यमा हुनसक्ने ठुला रोगहरूलाई रोक्न मद्दत गर्छ भन्ने कुरा सबैले बुझ्न जरुरी छ।विशेषगरी महिलाहरूको कुरा गर्दा, बढ्दो उमेरसँगै उनीहरूको शरीरमा धेरै परिवर्तनहरू आउँछन्। यस्तो अवस्थामा उनीहरूले आफ्नो स्वास्थ्यको विशेष ख्याल राख्न आवश्यक छ। २५ देखि ४५ वर्ष उमेर समूहका हरेक महिलाले समय-समयमा गराउनुपर्ने पाँच महत्त्वपूर्ण स्वास्थ्य परीक्षणबारे यहाँ चर्चा गरिएको छ।

• बोन डेन्सिटी टेस्ट

बोन डेन्सिटी टेस्टले हड्डीको मजबुती र शरीरमा रहेको क्याल्सियमको मात्रा मापन गर्ने काम गर्छ। यो परीक्षणबाट अस्टियोपोरोसिस जस्तो हड्डी कमजोर हुने रोगको सम्भावनाबारे पत्ता लगाउन सकिन्छ। समयमै यो परीक्षण गराएमा र हड्डीमा कुनै प्रकारको समस्या देखिएमा डाक्टरले समय छँदै आवश्यक सप्लिमेन्ट्स वा जीवनशैलीमा परिवर्तन गर्न सल्लाह दिन सक्छन्। यसले गर्दा भविष्यमा हड्डी भाँचिने वा खिइने जोखिमबाट बच्न सकिन्छ।

• प्याप टेस्ट

महिलाहरुका लागि प्याप स्मियर टेस्ट अत्यन्तै आवश्यक परीक्षण हो। यसले पाठेघरको मुख (सर्भिक्स) मा क्यान्सर वा क्यान्सर हुनुअघिको अवस्थालाई पहिचान गर्ने काम गर्छ। 

नियमित रूपमा प्याप टेस्ट गराउँदा महिलाहरुमा पाठेघरको मुखको क्यान्सर हुने जोखिमलाई धेरै हदसम्म कम गर्न सकिन्छ भन्ने कुरा हरेक महिलाले बुझ्न जरुरी छ। २१ वर्षको उमेर पार गरेपछि वा यौन जीवन सुरु गरेपछि यो परीक्षण समय-समयमा गराउनुपर्छ।

• कोलेस्ट्रोल लेभल परीक्षण

कोलेस्ट्रोल लेभल टेस्टले मुटुसम्बन्धी रोग, स्ट्रोक र रक्तनलीका समस्याहरू पत्ता लगाउन मद्दत गर्छ। शरीरमा उच्च कोलेस्ट्रोल हुँदा धमनीहरूमा प्लाक (बोसो) जम्न सक्छ, जसका कारण मुटु रोगको खतरा अत्यधिक बढ्छ। यदि समयमै शरीरमा कोलेस्ट्रोल बढेको कुरा पत्ता लाग्यो भने सही खानपान, व्यायाम र आवश्यकता परेमा औषधिको प्रयोगमार्फत यसलाई नियन्त्रणमा ल्याउन सकिन्छ।

• थाइराइड फङ्सन टेस्ट

थाइराइड टेस्टले शरीरमा थाइराइड हर्मोनको स्तर मापन गर्छ। थाइराइड हर्मोनको असन्तुलनले गर्दा अस्वाभाविक रूपमा तौल बढ्ने वा घट्ने, अत्यधिक थकान महसुस हुने, कपाल झर्ने र मानसिक स्वास्थ्यमा समेत नकारात्मक असर पर्ने जस्ता समस्या देखिन्छन्। यस्तो अवस्थामा समय-समयमा थाइराइड परीक्षण गराएर हर्मोनलाई सन्तुलनमा राख्न सकिन्छ। यसो गर्नाले स्वास्थ्यमा आउने धेरै प्रकारका समस्याहरूबाट जोगिन मद्दत पुग्छ।

• किड्नी र कलेजो फङ्सन टेस्ट

मिर्गौला र कलेजो फङ्सन टेस्टले शरीरका यी मुख्य अङ्गहरूको कार्यक्षमता कस्तो छ भनेर जाँच्ने काम गर्छ। किड्नी टेस्टबाट मिर्गौलाले शरीरबाट विषाक्त पदार्थहरू सही रूपमा बाहिर निकालिरहेको छ वा छैन भन्ने कुरा पत्ता लाग्छ। त्यसैगरी, समयमै लिभर टेस्ट गराउँदा कलेजोको स्वास्थ्य अवस्था, फ्याटी लिभर वा अन्य कलेजोसम्बन्धी रोगहरूको जानकारी प्राप्त हुन्छ। समयमै यस्ता परीक्षण गराउँदा भविष्यमा आउन सक्ने गम्भीर स्वास्थ्य समस्याहरूबाट बेलैमा बचाउ हुन्छ।