काठमाडौँ । असोज १५, प्रत्येक वर्ष आश्विन शुक्ल नवमी अर्थात् महानवमीका दिन मात्र सर्वसाधारणका लागि खुला गरिने तलेजु मन्दिर आज दर्शनार्थीका लागि खोलिएको छ। हनुमानढोका दरबार क्षेत्रमा अवस्थित यस मन्दिरमा हजारौँ भक्तजन बिहानै देखि पूजा आराधनाका लागि ओइरिएका छन्।
.gif)
हनुमानढोका दरबार हेरचाह अड्डाका कार्यालय प्रमुख काजीमान प्याकुरेलका अनुसार, मन्दिर खोल्ने सबै तयारी पूरा भइसकेको छ। सुरक्षा, भीड व्यवस्थापन र दर्शनको व्यवस्थालाई सहज बनाउन विभिन्न संयन्त्र परिचालन गरिएको छ।
यसअघिको फूलपातीका दिन, सोमबार, तलेजु भवानीलाई दरबारको मूलचोकमा झारिएको थियो। विजयादशमीको बिहान मात्र उहाँलाई पुनः मूल मन्दिरमा फर्काइने जनाइएको छ।
महानवमीको अघिल्लो रात अर्थात् महाअष्टमीको राति, मूलचोकमै कालरात्रि पूजा सम्पन्न गरिएको थियो। यस तान्त्रिक पूजामा ५४ बोका र ५४ राँगाको बलि दिइएको छ। शक्ति प्राप्ति र राज्य सञ्चालनको कल्याणका लागि गरिने यो परम्परा सदियौँ देखि कायम रहेको बताइन्छ।
तलेजु मन्दिर वर्षमा केवल एकदिन, आजकै दिन सर्वसाधारणका लागि खुला गरिने भएकाले भक्तजनहरूको उपस्थिति उल्लेख्य देखिएको छ।
