काठमाडौँ । मधेस प्रदेशमा पछिल्लो २४ घण्टामा थप ३६ जना हैजाका नयाँ बिरामी फेला परेका छन् । स्वास्थ्य सेवा विभाग अन्तर्गतको ईपिडिमियालोजी तथा रोग नियन्त्रण महाशाखाका अनुसार योसहित मधेसमा हालसम्म १ हजार ११७ जनामा हैजा पुष्टि भएको छ । महाशाखाका अनुसार हाल सक्रिय बिरामीको सङ्ख्या ८३ मा झरेको छ भने १ हजार ३४ जना निको भइसकेका छन् ।
.gif)
वीरगन्ज महानगरपालिकाका विभिन्न हटस्पट तथा अन्य क्षेत्रहरूमा खानेपानीको गुणस्तर निगरानी कार्य निरन्तर भइरहेको समेत महाशाखाले जनाएको छ । जिल्ला स्वास्थ्य कार्यालय र महानगरपालिकासँगको सहकार्यमा खानेपानीको नियमित परीक्षण भइरहेको हो ।
त्यस्तै, विद्यालयहरूलाई खानेपानीको शुद्धता सुनिश्चित गर्न फ्रि रेसिड्युअल क्लोरिनको स्तर कायम राख्न समेत सल्लाह दिइएको महाशाखाले जनाएको छ । झाडा पखाला तथा हैजाजस्ता रोगहरूबाट बच्न पानी उमालेर वा क्लोरिन प्रयोग गरी शुद्धीकरण गरेर मात्र प्रयोग गर्न समेत महाशाखाले सर्वसाधारणलाई आग्रह गरेको छ ।
