नेपाल राष्ट्र बैंकले (आज) आइतबार बजारबाट ५० अर्ब रुपैयाँ तरलता खिच्ने भएको छ । पछिल्लो समय बैंकिङ प्रणालीमा तरलता बढ्दै जाँदा केन्द्रीय बैंकले नियमित रुपमा तरलता प्रशोचन गर्दै आइरहेको हो । सोही अनुसार आज ४२ दिनका लागि उक्त रकम खिच्न लागेको हो । राष्ट्र बैंकको मौद्रिक व्यवस्थापन विभागका अनुसार निक्षेप संकलन उपकरणको प्रयोग गरी बोलकबोल मार्फत उक्त रकम खिच्न लागिएको हो । यसका लागि आज दिउँसो ३ बजे बोलकबोल हुने राष्ट्र बैंकले जनाएको छ ।
.gif)
निक्षेप दिन चाहने बैंक तथा वित्तीय संस्थाले घटीमा १० करोड रुपैयाँ र बढीमा ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्म बोलकबोल गर्न सक्नेछन् । निक्षेप संकलनको बोलकबोल ब्याजदरमा गर्नुपर्ने छ भने बहुब्याजदरमा पनि बहुबोलकबोल गर्न सकिने राष्ट्र बैंकले जनाएको छ ।
निक्षेप संकलन उपकरणको बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन् । यो ४२ दिने निक्षेप संकलन उपकरणको भदौ २९ गते साँवा तथा ब्याज भुक्तानी गरिने राष्ट्र बैंकले जनाएको छ ।
