काठमाडौं । नेपालमा भ्यालेनटाइन डे (प्रणय दिवस) अवधिभर साढे चार करोड रुपैयाँभन्दा बढीको फूल खपत हुने अनुमान गरिएको छ ।फ्लोरिकल्चर एसोसिएसन नेपाल (फ्यान)ले फेब्रुअरी ७ देखि १४ सम्म चार लाख २५ हजार स्टिम गुलाब (डज रोज) फूलको माग हुने अनुमान गरेको हो ।
.gif)
यसमा काठमाडौं उपत्यकाभित्र करिब दुई लाख ५५ हजार र बाहिर एक लाख ७० हजार स्टिम रोज खपत हुने फ्यानको आकलन छ ।आपूर्ति सहज भएमा यो सात दिनमा करिब चार करोड ६७ लाख रुपैयाँसम्मको कारोबार हुने अनुमान गरिएको छ ।बजार मागको करिब २५ प्रतिशत मात्र आन्तरिक उत्पादनबाट परिपूर्ति हुने र ७५ प्रतिशत आयात हुने संघको भनाइ छ ।
फूलको गुणस्तरअनुसार प्रतिस्टिमको उपभोक्ता मूल्य ९० देखि १२० रुपैयाँसम्म पर्छ ।गत वर्ष प्रणय दिवसको अवधिमा तीन लाख ५० हजार स्टिम गुलाबको कारोबार भएको संघले जनाएको छ ।नेपालमा चाडपर्व बाहेकको सामान्य दिनमा प्रतिदिन आठ देखि १० हजार स्टिम गुलाबको माग रहने फ्यानका अध्यक्ष राजेशभक्त श्रेष्ठले बताएका छन् । नेपालमा जाडोयाममा कम फूल उत्पादन हुने उनको भनाइ छ ।
