गण्डकी । पर्यटकीय राजधानी पोखरास्थित अन्तर्राष्ट्रिय पर्वतीय सङ्ग्रहालयमा अघिल्लो वर्षको तुलनामा विदेशी पर्यटकको सङ्ख्या बढेको छ ।सन् २०२३ मा सार्क राष्ट्रबाहेकका कुल १९ हजार एक सय १९ विदेशी पर्यटकले सङ्ग्रहालयको अवलोकन गरेकामा सन् २०२४ मा २२ हजार चार सय ७० ले अवलोकन गरेका छन् ।
.gif)
सङ्ग्रहालयमा पर्वतीय पर्यटनका विविध पक्षलाई जीवन्त रूपमा चित्रण गर्ने किसिमका सामग्री राखिएको कार्यकारी निर्देशक निर्मला न्यौपानेले जानकारी दिए ।उनका अनुसार सङ्ग्रहालयमा आउने पर्यटकमध्ये विदेशी पर्यटकका लागि प्रतिव्यक्ति सात सय ५० रुपैयाँ टिकट दस्तुर निर्धारण गरिएको छ । त्यस्तै, सार्क राष्ट्रका नागरिकका लागि तीन सय ५० रुपैयाँ, स्वदेशी अन्य सर्वसाधारणका लागि एक सय ५० रुपैयाँ र विद्यार्थीका लागि ८० रुपैयाँ टिकट दस्तुर निर्धारण गरिएको छ ।
सङ्ग्रहालयमा स्वदेशी एवं विदेशी पर्यटकको आगमन बढ्दो क्रममा रहेको उनले बताए । सन् २०२४ मा स्वदेशी एवं विदेशी पर्यटक गरी कुल ९५ हजार आठ सय ६२ जनाले सङ्ग्रहालयको अवलोकन गरेको उनको भनाइ छ ।
हिमाल र हिमाली जीवनका विभिन्न गतिविधिलाई नियाल्न सकिने सङ्ग्रहालयमा त्यस क्षेत्रमा बसोबास गर्ने जातजातिको रीतिरिवाज, वेशभूषा, कला र संस्कृतिका साथै भौगोलिक अवस्था आदिबारे जानकारी लिने व्यवस्था मिलाइएको छ ।
