काठमाडौं । काठमाडौंको गौशाला पिगलास्थानमा चारतारे होटल ‘बेस्ट वेस्टर्न प्लस काठमाडौं’ आज देखि औपचारिक रुपमा सञ्चालनमा आएको छ । संस्कृति, पर्यटन तथा नागरिक उड्डयनमन्त्री बद्री पाण्डे र नेपालका लागि अमेरिकी राजदूत डिन आर थम्प्सनले संयुक्त रूपमा होटलको उद्घाटन गरेका हुन् ।
.gif)
बेस्ट वेस्टर्न प्लस अमेरिकी चेन होटल ब्रान्ड हो, जुन नेपालमा पहिलो पटक भित्रिएको छ । होटलको निर्माणका लागि १ अर्ब ५० करोड रुपैयाँ लगानी गरिएको हो ।
सुइट, प्रिमियम, सुपर डिलक्स र डिलक्स गरी ८४ कोठा छन् । होटलमा स्विमिङ पुल, रुफटप बार, रेस्टुरेन्ट, एकै पटक ८ सयभन्दा बढी पाहुनालाई सेवा दिन सक्ने ब्यांक्वेट हल, फिटनेस सेन्टर, स्पा, सौना लगायत विशेषता छन् ।
होटलमा १ सय ५० जनाले प्रत्यक्ष रोजगारी पाएका छन् । त्रिभुवन अन्तर्राष्ट्रिय विमानस्थल र पशुपतिनाथ मन्दिरबाट नजिक रहेकोले होटलले छिट्टै बजारमा आफ्नो स्थान बनाउने विश्वास गरिएको छ ।
होटलले युरोप, अमेरिका, अस्ट्रेलिया लगायत देशका पर्यटक सँगै बढी पैसा खर्च गर्ने भारतीय पर्यटक बढी लक्षित गर्ने जनाइएको छ । पशुपतिनाथ दर्शन गर्न आउने भारतीय पर्यटकलाई होटलमा आकर्षित गर्ने बजार रणनीति रहेको जनाइएको छ ।
