काठमाडौँ । अभिनेता नाजिर हुसेनको लेखन तथा निर्देशन रहेको नाटक ‘हरि हजुरबा’ पुस ४ गतेदेखि २८ गतेसम्म मञ्चन हुने भएको छ । थापागाउँस्थित मण्डला नाटक घरमा मञ्चन हुने नाटकमा नाजिर स्वयंसहित अभिनेता विजय बरालको अभिनय रहनेछ ।
.gif)
नाटकमा रियुल्साङ, सबिना थापा, रोहित शाह, सुजना पाण्डे, मनिष पाण्डे र रिसु राउतको समेत अभिनय देख्न सकिनेछ । नाटकका निर्माता अभिनेताद्वय दयाहाङ राई र बुद्धि तामाङ हुन् ।नाटकले द्वन्द्वले पारेको प्रभाव र मानवीय सम्बन्धको गहिराइलाई उजागर गर्नेछ । चिठी पुर्याउँदै हिँड्ने हुलाकी केटो हरि र द्वन्द्वमा हराएकी नातिनीलाई पर्खिरहेका हजुरबाको मार्मिक कथा नाटकले देखाउनेछ ।
नाटकको कथा र लेखन कविताबाट उत्प्रेरित छ, जसलाई कथाको रूप दिनुका साथै नाटकको संरचनामा प्रस्तुत गरिएको छ । यस नाटकलाई द्वन्द्वले दिएको घाउमा मलम लगाउने प्रयासका रूपमा सिर्जना गरिएको निर्देशक हुसेनले बताए ।
आउँदो बिहीबारदेखि सुरु हुने नाटक पुस २८ गते (आइतबार) सम्म सोमबार बाहेक प्रत्येक दिन नाटक मञ्चन हुनेछ । शनिबार भने दिउँसो १ बजे र साँझ ५ः१५ बजे दुई वटा शो हुनेछन् ।
